Shillong: Ka seiñ kiwa kamai kari (taxi) ha nongbah Shillong hapoh ka lama yong ka East Khasi Hills Local Taxi Welfare Association ynne da kyntait ko ya ka hukum ka sorkar jylla, lyngba ka chnat Transport, kawa da khang yei kamai yong ki taxi ha i dur ka Odd & Even Number ha ka 23 wa ka 26 tarik uni u bnai.
Hawa yaklam ynne ka sngi, u Wandonbok Jyrwa, Secretary ka seiñ da pynsñiaw u yei wymye u pdiang ya kani ka hukum ka chnat, neidaw wymye i wow pynbiang yei kit i bah wa i lai i wan ki paidbah.
Kamtæ da chim noh ya ka rai wow sangeh i kamai ki kari ha kini ki sngi wow wan kamwa da phah da ka sorkar.
Neiliang ka seiñ da kyntu ko ya ki paidbah wa lada em iwon iwon i eh i khoo wa yachem ki paidbah khamtam hawa em kiwa chitom hapyrdi i kjut wa lada emkaam ki, neiliang ka seiñ hi u wan ko chaphrang wow yarap ya ki paidbah.
Ya ini waroh da pynsñiaw hadien wa yachem wa u Commissioner & Secretary ka chnat Transport ka jylla, u I.W. Ingty, ha kamra krehkaam yong oo.
Neiliang u Ingty da kyntu u ya kiwa kamai wow man ki kiwa husiar wei syndong wow yada pyn yaki hi kamjooh leh yei man i long ki bru wa kit ki.
Discussion about this post