U President ka Voice of the People Party (VPP), u Ardent Miller Basaiawmoit ha ka kyrwoh wa da phah da ong u wa i rai ka sorkar wow pynman biang ya ka Cherry Blossom Festival da wanrah ko yei khñium na kiwa boon neibhah kani ka tamasa yong ka sorkar ym em ko iyi iyi wow pynyoo næ wow khana chaphang ka riti dustur wa i man kyrpang i rukom im yong kiwa chong chnong ka jylla tangwa da wanrah yei jia wa yoo paar snieh kiwa ye wow pynhiar dor wei pyndooh burom ya kiwa chong chnong wa ya ka jylla hi waroh kawi.
Da ong u leh wa lada toh kamwa da mih khubor wa ya kani ka tamasa ka sorkar da chim ko da ka ram wow pynman, ki paidbah ka jylla em ki yei hok wow pyrchah ya kani wei leh wow kylli ya ka sorkar hajrong i rai wow pynman ya kam kani ka tamasa.
Da ong u wa i toh ka jylla wa khian kawa da kit ram chi rynyieñ wei ini i pteiñ wow chim ram daw nang pynsih chooh chooh ya ka muna tangka yong ka jylla. Na ini i daw da kyntu ya kiwa em hei bor wow sangeh chi syndon yeini i pynlut phut ya ka poisa u paidbah ha ki kaam kiwa ym wanrah i mih iyi iyi neibynta i bha i biang yong ki paidbah ka jylla.
Ha iwi won i liang, ka VPP da beiñ ko ya ka sorkar kawa da lai chakhmat wow pynkrehkaam ya ka aiñ yakhle heiwa ym em wa bien u kyrchaan ya u MLA ka North Shillong, u Adelbert Nongrum wow pyndam noh ya kani ka Bill.
Da ong leh u wa i klam u Montri Rangbah wym lai chakhmat yei thmu wow wanrah ya ki Casino toh iwa pynbiej ya ki paidbah wa khamtam ya kiwa yahkhmat Balang.
