I lai i wan ki kari kamjooh ki rel ha kiwa boon ki bynta ka Tripura khamtam kiwa haap hapoh ka Tripura Tribal Areas Autonomous District Council (TTAADC) da thut lut i ynne hadien wa pynman yakhih deiwa khang ya ki sarok wa ki luti rel hajrong i dawa wow pynemkaam da ki dak Roman Script namo ki dak ktien pharæng yow thoh yaka Kokborok Subject haka Board Exam wa pynman da ka Tripura Board of Secondary Education (TBSE).
Yeini i yakhih da pynman ha palat 50 tylli ki thaw da ka Twipra Students’ Union deilang waka Tipra Indigenous Students Federation (TISF).
Kiwa yakhih da ong ki da dawa ki wow pynemkaam da ka Roman Script yow thoh yaka ktien Kokborok haka Board Exam wei yeini da pyntip ki leh cha u President ka TBSE tangwa ka sorkar ym pu em ko yei jubab neibhah da pynbor ya ki wow thoh yei ktien Kokborok deiwa pynemkaam da ki dak Bengali wei ini man ko pyrchah yei hok yong ki wow jied.
Neiliang u Chairman ka TTADC da ong u wym em pyrchah yei pynemkaam da ki dak Bengali wei ym em pyrchah ki leh yei pynemkaam da ki Roman Script.
Kiwa yakhih da ong ki wa ya kiwa klam yaka ktien Kokborok suk ki wow thoh da ki dak Roman Script tangwa ka sorkar syndet syndet khlem da pyntip da phah ko ya ki khynnah wow thoh da ki Bengali Script ha ka Board Exams, kamtæ da pynman ki da kani ka yakhih kawa khlem da booh por.
Kiwa klam yaka ktien Kokborok toh ki jaitbru ri-loom kiwa em 19 tylli ha Tripura kiwa da dawa yei hok yow jied da kiwon ki dak u pynemkaam hawa thoh yei ktien yong ki hi.
Tangwa neiliang u President ka TBSE da ong u wa ya kitu kiwa thoh Exam da ki dak Roman Script daw e FIR pyrchah ya ki.
Hadien wa pynman yei yakhih, ka sorkar Tripura da rai ko wow e laad ya ki khynnah wow jied ki da kiwon ki dak wa kwah ki wow pynemkaam.
Discussion about this post