Ki MDC ka Khasi Hills Autonomous District Council (KHADC) da mynjur ki wow phah ya i jooh i yumut cha ka sorkar jylla hajrong i thmu wow pynkylla ya ka Sixth Schedule, ya kawa daw phah ka Home Ministry yong ka sorkar India.
Hadien ka yalang yong waroh ki MDC ka KHADC, neiliang u Chief Executive Member, u Titosstarwell Chyne da ong u wa neiliang ki MDC da pdiang ki ya i e yumut ha waroh ki rai wa da chim ha ka yalang neibynta wow phah ya ki yumut cha ka Home Ministry ka sorkar India.
Da ong u leh wa ka KHADC ym yahap ko wow pynboon ya ki chuki (Seat) cha ka 40 ngut ki MDC neibhah wa ka Council daw chem chitom ko wei daw ktah leh yei man i long ki thaw, wei daw ktah ko leh ya ka muna tanka neibhah kamwa man katni ka Council duna bha i yoh poisa ko wei daw ktah ko leh ya ka tulop, tangwa da ong u leh wa em ki MDC Constituency kiwa da emkaam wow phiah noh kam ka Mawlai, Nongstoin, Mawshynrut Mawryngkneng wa kiwi kiwi wei ya ini leh daw pyntip noh cha ka sorkar.
Hajrong ki MDC wa chah tyrwa pyrtuid namo ki Nominated MDC ya ki wow thung da ki MDC ka KHADC da toh wow thung noh du 2 ngut, wow kynthup ya kawi ka kynthai khlem kheiñ ya ka jaitbru wei ka Council ym yahap ko ya i e yumut ka Parliamentary Standing Committee wow thung bait da ki Unrepresented Tribe.
U Titos da ong u leh wa heiyatoh wa ki Village Council kani ka Amendment daw wanrah ko ya i rukom krehkaam ki Panchayati Raj, tangwa i thmu yong ki ADC ka jylla toh wow pynneh pynsah bait ya ki Riti Dustur wa ki aiñ tynre wei ki MDC da rai ki wa ym pdiang ki ya ki Village Council tangwa ka sorkar India toh u tipmit bait ko ya ki Dorbar Shnong.
