Kiwa chong chnong ka Wahiajer wa em hapoh ka Narpuh Elaka da thoh ki cha ka sorkar wow pynsñiaw yei pyrchah wow sdang sa kawi ka karkhana pynmih khyndaw-bilat kawa tip kam ka Mega Bond Cement Ltd ka wow em hapoh ka chnong Wahiajer Narpuh.
Kini kiwa chong chnong kiwa da em 73 ngut kiwa da soi pyrtuid wow pyrchah yei sdang ya kani ka karkhana hapoh ka chnong da kyntu ki ya u Montri ka chnat Commerce & Industry, u Sniawbhalang Dhar wym toh u e bor namo ka NOC ya kani ka karkhana hapoh ka chnong hanla u waheh chnong ka Wahiajer da dep u wow e NOC.
Kini kiwa pyrchah da ong ki wa ka chnong yong ki da kær kut soodong sa du ki Cement Factory kiwa da kular wow e kreh wei wow wanrah ya ka roi ka paar tangwa da yoo wa kini ki karkhana da wanrah pathan ki yei ktah wa sih bha bar yeiwa bha hadooh wa da dooh leh yaka la-ær wa khooid, ki tyllong um kiwa waroh ym ye de u pynemkaam wei lada mih chooh chooh kiwi ki karkhana daw joor chooh chooh i chah ktah.
Da ong ki leh wa da pyrchah ki neidaw wa daw ktah yei chait i khiah kiwa chong chnong, neibhah ki jakhlia wa mih na kini ki karkhana da ktah ko yei riñ mynsien iwa yah cha ki kjut kam i Bronchitis, Asthma, Lung Cancer, Pneumonia, Tuberculosis wa kiwi kiwi heiwa 99% na ki nongmuna wa chim na kiwa chong chnong ka Khrew toh iwa da ood wa chem chitom ki wow riñ mynsien, kiwa kjut rupai. 96% toh kiwa joor ka ka’oh, 97% toh kiwa booid ki khmat. Kiwa att kjat hadooh wym ye u lai da em ki 43% wei 19% toh kiwa yoh Tuberculosis.
Chooh chooh da ong wa daw lut ki khloo deiwa em kani ka karkhana, daw ktah ya ki tyllong um wa ki wah, daw ku i chit, khamtam kitu ki warep kiwa em ha Wahiajer Narpuh kiwa rep ya u kwai, pathi, saroo, ki soh wa kiwi kiwi neidaw kini ki karkhana pynmih ki boon jait iwa da ktah yei heh i san ki mar rep.
Da kdaw leh wa na ki 8 tylli ki karkhana Cement wa em ha thaaiñ Narpuh, 3 tylli toh kiwa em hajan ka chnong Wahiajer kiwa da kular wow e kreh tangwa la palat 10 snem em ki ym em yoh myntoi yoh kreh kiwa chong chnong katwa kini ki karkhana won da yoh nong ki cha palat deiwa chah ktah kiwa chong chnong deiwa e nongmuna wa i tympdung ya ki paar tih moochuni da ki Dynamite da pynkaad ya ki yung wa sah ki bru neidaw da man kamwa khih khmi kut i por wa tympdung ki wei ini waroh da man kam ka tim ymtoh de i kyrkhu.
Kamtæ da kyntu ya ka sorkar wym toh u pynman ya ka chnong Wahiajer Narpuh kam ka Economic Zone wow wan booh ya ki karkhana neibhah chah chim kabu donhi kiwa chong chnong khlem yoh myntoi ki.
Da ong ki leh wa waroh kini ki karkhana wa em ha kani ka thaaiñ Narpuh toh kiwa man pyrchah aiñ neibhah da pynyieñ ya ki ha ki thaw wa man khloo wei hajan ka Narpuh Wildlife Sanctuary waka Narpuh Reserve Forest wei deiwa lai luti leh waroh da yoo wa ka Narpuh toh ka thaw wa em ki khloo wa rben ymtoh ka thaw wa sah chrah ka wym em wa pynemkaam.
Hajrong ini waroh da ong wa i leh u waheh chnong, u Sibren Sumer uwa man leh kam u General Secretary ka Elaka Narpuh uwa da kular u wow e NOC ya kani ka chnnong ymtoh deiwa yoh i mynjur yong waroh kiwa chong chnong neibhah kiwa pyrchah leh em hi ki tangwa da leh u yeini deiwa kam wa da yoh u yei kyrchaaan yong kiwa boon (Majority).
Kini kiwa pyrchah da pyntip ki wa da dep ki wow thoh cha u DC ka District, u Montri Rangbah ka jylla wa cha ka Meghalaya State Pollution Board wow pyrchah yeini deilang wa i soi pyrtuid kiwa pyrchah wei da phylla kammon ka Single Window Agency dang nood ko wow e bor wow lai chakhmat ya kani ka karkhana khlem da pyrkhat ya ka mynried.
Hawa kylli na kiwa pyrchah yei daw wa em kiwa e kyrchaan, da pyntip wa u waheh chnong da kular u wow pynyoh kreh hapoh kani ka karkhana.
Discussion about this post