U MLA ka West Shillong Constituency, u Mohendro Rapsang da pynsñiaw u yei pyrchah hajrong i thmu yong sorkar wow kyrriah ya kiwa sah ha Them Metor cha Mawbah hajan wa ka Reid Provincial Chest (TB) Hospital, kawa haap hapoh ka West Shillong.
Da khana u wa da yoh yutip wa ini i thmu yong ka sorkar nadooh wa sdang wei da yachem u wa u Symbood Montri Rangbah uwa man leh u Chairman ka High Level Committee, u Prestone Tynsong wei hadien wa da mih biang kani ka khubor daw lai u wow yaklam biang wei pyrchah sa chisien.
Ka sorkar jylla ha ka 13 tarik uni u bnai da pyntip ko wa hapoh ka High Court da dep wow pynkhreh ya ka ‘Blueprint’ namo i pynwandur ya ka yung paki dulan ha i thaw wa heh kamwa 3 Acre ha Mawbah yow kyrriah ya ki bu na Them Metor.
Hajrong kani ka khubor, u Rapsang da ong u wa da dep wow yaklam leh wa kiwa pynlai chnong kiwa da pynsñiaw yei jooh i pyrchah hajrong ka yurim wa katai ka thaw toh kawa da khynnia chwa wei dei wanrah chooh chooh sa kawi ka Colony daw man chooh chooh kawa khynnia wei iwa ar toh wa katai ka thaw kawa em leh ya ka Hospital wow sumaar ya kiwa kjut, ym toh wow pynkhynnia da kiwa chong chnong.
