Jowai : Ka seiñ Khasi Jaińtia National Union (KJNU), ha ka khubor na u President yong ka u ma Niman N. Shadap, da ong u wa ka seiñ ym jooh thok næ jlær ko ya ki paidbah khamtam ya ka chnong Mihmyntdu hajrong ka scheme wow chna paikhana wa tip kam ka TSC, kamwa da kynnoh da u waheh chnong ka Mihmyntdu u ma Lakhon Ryngkhle kamtæ ki le seiñ da dawa ki wow pynche u yeiwa da kynnoh u pyrchah ya ki le seiñ kiwa kynthup ya ka KJNU, MPUF wa ka AHPUF.
Neiliang ki seiñ da ong ki wa sñiaw langoh ki u yoo ya ka khubor hawa yoo ya kam kini ki khubor tlep ait miaw hajrong wa pynemkaam bakla u yei pyrtuid ki paidbah heiwa da pynemkaam yow yoh myntoi samen donhi.
“Lada uni u waheh chnong ka Mihmyntdu ym ye u wow rah ya ki sabut wow kynnoh pyrchah ya ki le seiñ, tæ pynyoo wa uni u waheh chnong da thok u ya ki khon ki yong ka chnong Mihmyntdu” da ong ki le seiñ.
Ki le seiñ da ong ki leh wa kam u wa kitkaam chnong ym toh u kynnoh u khlem nongrim wei emkaam u lai u cha ka tnat PHE wei wow paan da ka RTI khnang wow yoh u yeiwa sakhiat chwa wow khlai u ya ki kyntien kiwa khlem kaam wei lada iwa kam u man i iwa sakhiat toh u ujor (FIR) cha ki pulit.
Ki le seiñ da ong ki wa daw lai ki chaphrang deiwa paan RTI heiyatoh wa ki scheme wa boonjait khnang wow ye u pyndooh yei kaam thok wei kaam baamsap.
Discussion about this post