Ka yalehke Final wa da pynman ynnin ka sngi yong ka lympung yaleh Cricket ka Seiñraij Niamtre Ummulong kawa tip kam ka 1st Ram Sing Lamare Cricket Tournament Cup 2021, ka Chiruplang da yachem ko waka Loom Soo Yung Ummulong heiwa da wan sakhilang da u Montri ka chnat Transport uwa man leh u MLA ka 1-Nartiang Wahiajer Constituency, u Sniawbhalang Dhar kam u kongsan deiwa emlang leh u District Sports Officer ka West Jaiñtia Hills u Khroobok Passah kam u symbood kongsan wa u Waheh Chnong ka chnong Ummulong u Leo Laloo.
Hachwa wow poi cha ka yalehke da em ka yalang wa tbian heiwa u President ka Seiñraij Niamtre Ummulong u Mul Passah da pynlai u ya kani ka yalang kam u chongknor, da yoh leh yei klam tbian heiyatoh wa ka Tournament kamjooh yaka parom heiyatoh wa u Tynrawade u Ram Sing Lamare na u General Secretary u Embhahlang Rymbai kammon wa da pynsah naam pynsah burom ya kani ka Tournament hei pyrtuid yong oo. Da yoh yei klam naki kur yong Lamare kamjooh na ki khon yong u (T) Ram Sing Lamare.
Da yoh leh yei klam na u symbood kongsan wa na u kongsan wei hachwa wow poi cha wakut ka yalang da yoh yei kyntien ngooh Blai na u khynroo Sainborlang Rymbai kamjooh yei kyntien e khublei na u Secretary ka Khynroo Khyllood u Samekhatle Lamare.
Ha kani ka yakhun Final, ka Chiruplang da jop ko da 20 Run yaka Loomsoyung Ummulong.
Uwa boon Run dooh toh u Rejoice Gassah 97, u Langmi Bamon 23, u Chongtre I Man Lamare 53 wa u Redolan Roy Shylla 18.
Na kiwa kawang bol wa ye u pynhaap boon Wicket dooh toh u Redolan Roy Shylla uwa da yoh u pynhaap 3 Wicket wa u Bala Pynshai 2 Wicket.
