Ka lympung yalehbol wa tip kam ka Independence Day Cup Under-17 Football Tournament 2025 wa pynlai da ka yung krehkaam u Deputy Commissioner ka West Jaiñtia Hills District deilang ka yung krehkaam u District Sports Officer wa ka West Jaiñtia District Sports Association, ynne ka sngi dapoi ko cha ka yakhun Final ha Kiang Nangbah Stadium Dongmihsngi, Jowai hapyrdi ka Lumpyrtuh SYC Mihmyntdu pyrchah ya ka Da-I-Hi Sports Club Mynsngat.
Ya kani ka yakhun Final da wan wow sakhi da ki paidbah wa boon heiwa u Wailadmiki Shylla, MLA ka Jowai uwa man leh u Chairman ka MUDA da wan u kam u kongsan chirup i emlang u Khroobok Passah, Asst. Director Sports and Youth Affairs ka sorkar jylla uwa man leh u District Sports Officer ka West Jaiñtia Hills District, kiwa yahkhmat ka West Jaiñtia District Sports Association wa kynthup ya u Kmen Lato, Founder Member, u Patrick Lamare, Vice President, u EMH Passah, Working President WJDSA, u Lamat Oo Laloo General Secretary wa kiwi wa chah khut sñiawbha.
Yei naam jop ha kani ka lympung da yoh rah da ka Da-I-Hi Sports Club Mynsngat deiwa pynrem da 2-0 ya ka Lumpyrtuh SYC Mihmyntdu.
Neitæ najrong wa saam khusnaam cha liang wa jop wa kiwa rem, da saam leh ya ka khusnaam Man of the Match wa da yoh da u Bantei Pyrtuh, i naam Best Goalkeeper da yoh u Onipaia Pyrtuh katwa yei naam Top Scorer da yoh u Ribait Bang kiwa waroh le ngut toh kiwa yalehke yong ka Da-I-Hi Sports Club Mynsngat katwa yei naam Player of the Tournament da yoh u Serene Dkhar na ka Lumpyrtuh SYC Mihmyntdu.
Discussion about this post