Jowai : Ka District Level Gramoday Initiative Open Football Tournament ynne ka sngi da pynman ya ka yakhun final ha pyrdi ka Khla Shympa wa ka 7 Wasa ha Kiang Nangbah Stadium, Ladthadlaboh.
Ka yalehke man ko kawa yoosuk bha. Ka Khla Shympa da sdang ko deiwa khlan bha heiwa da thap kool ko ha ka minit wa 3 ka kylla step lyngba u Bormi Buam wei ka kylla step man ko ka yong ka Khla Shympa heiwa boon na ki por ka boll da neh ko ha ki kjat kiwa yaleh ke yong ka, kamtæ lyngba ka chut corner da yoh biang ko u thap sa chi kool ha ka minit wa 31 lyngba u Tiplang Rasmut. Ka kylla step da kut ko da 2-0.
Ha ka kylla miet ka 7 Wasa da sdang ko u pynyoo ya i sap yong ka iwa da naam deiwa thap ko ha ka minit wa 3 ka kylla miet lyngba ka free-kick wa chut u Jassany Tariang kawa lai sak ha kool khlem em wa yoh u khang laad ka.
Hadien inin da yoh laad ka 7 Wasa kamwa 2 sien kiwa suk tangwa uwa yang kool ka Khla Shympa won ym e laad u. Ha ki minit wa khaddooh ka yalehke ka 7 Wasa da yoh ko le tylli ki chut corner tangwa ym em ye ki u pynkylla ki cha ki kool. Kamtæ ka yalehke da kut ko 2-1 cha ka Khla Shympa kam ka Champion.
Ha kani ka sngi da pynbna leh ya u Suman Sarkar kam u ‘Best Goalkeeper’ wa ya u Batskhem Tariang kam u ‘Best Player’ pyn ar na ka Khla Shympa.
Kiwa jop leh da yoh ki ya ka song poisa T. 10,000 katwa kiwa rem da yoh ki T. 5,000.
Discussion about this post