Ka lympung yalehbol hapyrdi ki kur kawa tip kam ka 2nd Sumer League 2022 wa pynlai daka Sumer Socio Cultural Sports & Education Development Society hapoh ka Sumer Elaka East Jaintia Hills District, dapoi ko cha ka sngi wa kut ynnin ka 11 tarik.
Ha kani ka sngi da wan sakhi lang da u Lambha Syrtu, u Jrom Lamurong uwa da e yei klam wei sneiñ kyntu ya kiwa yalehke yow man kiwa yakhun dei hok wei wow em akor.
Neiliang won u Sel Syrti da yaroh u ya ka Society wa stat ki u pynman ya kam kani ka jait lympung kawa kyntu yei sap i phong yong ki paidbah. Da yoh leh yei klam na u Secretary ka Society, u Amnesty Salahe wa u President, u Begin LS Paslein uwa da khana yei thmu ka Society wow pynku yei sap ki khynnah kiwa em hapoh ka Sumer Elaka, wei ha uni u snem hapoh ka 2nd Sumer League da chimbynta 7 tylli ki kur.
Da khana u leh wa da em i thmu wow pynman ya ka Sumer Got Talent wei da kyrpaad u ya ki khon ka Elaka wow em ki ka mynsien ya krehlang wa ka Society wow wan pynyoo yei sap yong ki ym du hapoh ka Elaka tangwa yow poi cha ki District wa ki State wot cha kiwi ki ri.
Ha wa kyruiñ cha ka yalehke Final, ka Salahe Pakem FC da yachem ko waka Chyrmang wei da kut ka yalehke da 0-0 hadooh wa kut i por, kamtæ yow rai ya kiwa jop da pynman dei yachut Tie-Breaker heiwa ka Salahe Pakem FC da jop ko ya ka Chyrmang FC da 3-2.
Yei naam Best player da yoh u Medon Salahe uwa naka Salahe Pakem FC. Yei naam Best Goal Keeper da yoh u Shaniah Pakem uwa naka Salahe Pakem FC katwa yei naam Top Scorer da yoh da u Das Dkhar naka Dkhar FC.
