Ka lympung yalehbol ka Elaka Narpuh Sports Association (ENSA) kawa tip kam ka ‘Elaka Narpuh Football Tournament Champions 2021′ da poi ko cha wakut ynne ka 27 tarik da ka yakhun Final hapyrdi ka Lumshnong YWSC A waka Ratacherra Lumtrom SC.
Ka Lumshnong YWSC A da jop ko ya ka Ratacherra Lumtrom da 1-0 lyngba ka kool wa thap da u Nelson Rymbai ha ka minit wa 16.
Ya kani ka yakhun Final da wan sakhilang da u Kor Sympli, Vice President UDP, Meghalaya kam u kongsan wa u Bhamon Shylla kam u symbood kongsan.
Yei naam Player of the Tournament da yoh u Nelson Rymbai (Lumshnong YWSC A), yei naam Man of the Match (Final) da yoh u Nelson Rymbai (Lumshnong YWSC A), Best Goalkeeper da yoh u Yoowanmi Syrti (Lumshnong YWSC A), Top Scorer da yoh u Ker Pala (Umkiang Sports Association), Emerging Player of the Tournament da yoh u Donald Bareh (Umkiang Sports Association), yei naam Golden Boy of the Tournament da yoh u Fedrick Suchen (Shymplong SC), Fan of the Tournament da yoh u Denis Chyrmang (Umkiang) katwa yei naam Most Discipline Team da yoh ka Ratacherra CSC.
Ka Lumshnong YWSC A kam ka Champion da yoh ko leh ya ka song poisa wa T. 50,000 deilang wa ki takma waka Trophy katwa ka Ratacherra Lumtrom da yoh ko T. 30,000 kamjooh ya ka Trophy wa ki takma.
