U Montri wa pait ya i Kaam Pohyung ha ka jylla, u Lahkmen Rymbui da pyntip u wa ki pulit da kem ki sa ya uwi u paralok yong u khynnah wa dang hapoh 18 snem i rta, hajrong i suba wa emkti ha pynpdung Bomb IED ha Khyndailad, ha ka janmiet ka 30 tarik. Katkam wa pyntip u Rymbui utai u khynnah wa da chah kem nyngkong toh uwa naka thaaiñ Demthring, Nongthymme. Ki pulit hadien wa kem ya utai uwa suba emkti, da rah ki leh ya uwi won uwa man u paralok yong oo uwa na Nongstoin, West Khasi Hills wow pynman ya ka takit.
U Rymbui da pyntip u wa hadien wa pdung Bomb, ki pulit du hadien kattu katni kynta da lai kem noh ki ya uni u khynnah na ka yung sah yong oo wei da yoh kem leh sa uwi Bomb IED u wym pu em pynpdung, ya uwa ki pulit da tympleh noh ki oo, wei da rah noh ya utai u khynnah wow takit wei ki pulit da leh ki katkam ka aiñ Juvenile Justice Act. Da ong u leh wa ki paidbah ha kani ka kynti da e ki yei ya krehlang wa ki pulit heiwa da ye wow kem ya ki bru kiwa suba emkti.
Hawa kylli lada ki toh kiwa yarap yong ka HNLC, u Montri da ong u wa ki pulit hap ki wow thooh bait ya ki bru kiwa emkti ha ki kaam damok, khlem da pynbaad næ kdaw ya kiwon kiwon, tangwa daw kdong chwa ya ki damok, heiwa da kyntait u wow klam hajrong i kam yong ka HNLC wa emkti hajrong itai i jia, tangwa da ong wa ka aiñ daw leh ko ya iwa emkaam ya ki damok wa emkti.
Da ong u wa ya katni da hap wow e laad chwa ya ki pulit wow pynman ya ka takit kawa bniah, hadooh wa da ye wow sai madan ya waroh i sakhiat.
Hawa kylli chooh chooh, u Montri da kyntait u wow ong wa tkoh i yoh yutip ki pulit, deiwa ong wa lada tlot ki pulit ym yoh kem ya kiwa emkti du hapoh kajiak kynta. Da ong u wa ki pulit ki paitbniah ki wei man ki kiwa husiar bha, tangwa emkaam leh wow pynbha chooh chooh ya ka rukom krehkaam katkam ka juk wa katni.
