Rai ka BJP Amlarem Mandal wow kyrchaan pura ya u RL Tariang ha ka Election wow wan

Amlarem: I pynkhreh ki kyrtong wa ki seiñ saiñ hima neibynta ka Election jied wa mihkhmat cha ka Yung Dorbar Thaw-aiñ ka jylla da lai i chaaid chaaid.

Hawa kyruiñ won cha ka Amlarem Constituency, ha ka yalang wa pynman ka Bharatiya Janata Party, Amlarem Mandal ynne ka sngi da pdiang burom ko yei wan psiah u Dr. B.Lato cha ka Party. Ha kani ka yalang da rai wow kyrchaan chibor ya u RL Tariang, uwa jooh man kam u MLA warim kani ka Constituency.

Chooh chooh ha ka yalang da pynman ya ka kynmoo warom ya u Hame Bthuh uwa da khlaad noh na sla pyrthai ha ka ya tyrrah kari ha ka tayaw wa dadep.

Hawa pdiang sñiawbha ya u Dr. B. Lato, u RL Tariang kam u President ka BJP Amlarem Mandal da pynsñiaw u yei kmen wa yoh u yakrehlang wa u Dr. Lato, uwa da kreh ha Pdengchakap PHC ha ki snem wa dadep.

“I em i ki moolangnai ha kani ka Constituency kiwa chah ieh khlem em wa pait de ya ki,” da ong u RL Tariang hajrong ki project pynmih bordiñ kam ka Leshka, Umngot wa Umkshar.

“Ki project pynmih bordiñ toh u krehkaam ki neibynta i myntoi ymdu ya ki paidbah ka thaiñ kamjooh leh ya ka jylla waroh kawi,” da pynrap u Tariang uwa da pynsñiaw wa ka Leshka Phase 1 da ye ko u pynmih bordiñ du chiteiñ na kawa da booh na ka 126 MW.

Ya ka yalang da pynlai da u B. Pakyntein uwa man u Vice President, kiwi kiwa da klam kynthup ki ya u Everest Langstang, President BJYM Amlarem Mandal, u Dr. B Lato wa kiwi kiwi.

Related posts

Ya ka Election cha GHADC daw pynbna hadien ka Delimitation

April 15, 2026

Baam smai u Samrat Choudhary kam u CM wa thymme ka Bihar

April 15, 2026