Shillong: U MDC ka UDP na Umsning uwa man leh u kyrtong MLA ka UDP, u Donkupar Sumer da beiñ u ya u CEM ka KHADC u Pynshngain N. Syiem wa ym yaphær i na i synchaar embor yong u Dr. Mukul Sangma wei man u u Mukul Khasi.
Hawa klam ynne ka sngi u Donkupar u da sin u ya u Pynshngain kam u Mukul Khasi neidaw wa man u uwi na pyrdi ki CEM uwa leh bor wei da pynman Politics u ya ki kaam yong ka Council khamtam hei yatoh wa ka Scheme Special Central Assistance Scheme kawa T. 133 Klur wa poi na ka sorkar pyrdi.
U Donkupar da pynbaad u wa na ka T.133 klur, u CEM u da saam u mar T.3 klur ya ki MDC wa T.30 klur ya kiwa emkaam ka Council tangwa sa T.16 Klur won ymtip cheiwon wiar ko.
Heijooh i por da pynbaad u wa ha Umsning, u CEM da saam scheme u khlem i tip u kam u MDC ka thaiñ ha kini ki sngi cha man ki chnong wei ya kini ki scheme da e wow pynkrehkaam cha ki bru ka People’s Democratic Front (PDF).
Katkam i ong u Donkupar em 19 tylli ki Work Order wa u CEM da lai lait u ya oo kam u MDC, deiwa e ha ki bru ka PDF iwa da kynjoh kamwa T. 20 lak.
Hawa pynsñiaw u ya i wym ye u pdiang ya ini i leh politics, u MDC ka Umsning da ong u wa da dep ujor u cha u CEM ynne ka sngi hi wei da dawa wow pynsangeh chwa ya waroh ki Work Order neibhah da leh yeini khlem i tip u kam u MDC.
Da ong u wa daw lai ujor u leh cha u Chief Secretary uwa man u khlieh yong ka State Level Screening Committee u wow pait ya i pynkrehkaam ya ki scheme ka Council hei yatoh wa ka T.133 Klur.
U MDC ka Umsning da pynbaad u wa ini i leh politics u CEM ka KHADC man i kam i thmu wow thied vote neibynta ka election ya u kyrtong ka PDF, u Jeson Mawlong.
Da ong u wa u Pynshngain da pynemkaam bakla u ya ka T. 133 Klur neibynta ki kaam ka party iwa man leh i wymye u pdiang.
Heijooh i por da ong u wa i pynbaad u Pynshngain wa ka UDP toh ka team B ka Congress, ka NPP won ka team B ka BJP, weileh won ka PDF yong oo chong lang ko wa ka BJP ha ka EC ha KHADC deiwa e leh ya ka tnat khayi wa ka muna tanka, kawa man kawa emkaam tam, deiwa ong wa lada kamni toh hi mo oo uwa maya jaitbru.
Chooh chooh da beiñ u ya u CEM ka KHADC wa pynbiej hi-eh u ya ki seiñbhalang hei yatoh wa u sarok Nongstoiñ-Wahkaji-Mawthabah neibhah hawa sdang da kular u wow mang T. 20 klur tangwa khlem leh iyi iyi leh wei hadien wa pynkynmoo biang ki seiñbhalang da pynbiej u deiwa kular wow e T. 25 klur katwa katni won da mang du T. 4.5 Klur wow chna pynmiat ya u sarok.
Heijooh i por u MDC ka Umsning da dawa u leh na ka KHADC wa toh u thung noh ko da u Syiem wa pura ha Hima Mylliem neibhah ini i leh ka KHADC da pynphylla ko yei pynhiar wa i thung Acting Syiem ha ka Hima Mylliem.
Discussion about this post