15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Rai ka Dorbar Chnong Mutong wow khang dooh yei tih mooyong wow pynneh ya ki thaw uiñke suwari

Ka Dorbar Chnong Mutong, East Jaiñtia Hills ha ka 27 tarik uni u bnai wa dadep da thoh ko cha u Deputy Commissioner ka District wow pyntip ya ki kaam wa da leh hapoh u pood ka chnong khnang wow pynneh ya i miat ki thaw uiñke suwari wei kamjooh leh ka rymaw waroh kawi. 

Da ong ko wa nadooh ka 14 Naitung 2014 nadooh wa khang ka NGT yei tih mooyong hapoh ka jylla, neiliang ka Dorbar Chnong da chim ko ya ka rai wow pynneh pynsah ya i miat ki thaw uiñke kiwa hapoh u pood ka chnong. 

Ka Dorbar Chnong ha ka 8 Naiynñiaw 2016 deiwa bood ya ka hukum ka NGT da rai ko wow khang ya i tih mooyong hapoh u pood ka chnong kam chibynta wow yada ya ka rymaw wei da pynkynmoo ya ki paidbah ka chnong hajrong ini.

Chooh chooh ka Dorbar Chnong da pyntip ko leh ya u Deputy Commissioner ya i rai wow khang dooh (khang rta) ya iwon iwon i jait kaam wa yatoh wa i tih mooyong hapoh u pood ka chnong hanlada em kiwa pynkhreh ya ki Mining Plan wow tih moo deiwa paan bor na ka sorkar, ka chnong u man ko kawa pyrchah yei thmu khnang wow ye u yada yei man i long ka rymaw talawiar soodong ka chnong. 

Ha kani ka 29 tarik uni u bnai, ka Dorbar Chnong da thoh ko cha ki paidbah ka chnong wow pynkynmoo yeini khnang wow pynneh pynsah ya ka rymaw.

Da pyntip ko leh wa ki thaw wa da khang dooh ya ki kaam tih mooyong u man ki nadooh Um Yingkhoi chadooh Synrang ka Mon, Mookyrong (Mutong) Wyrsha ka Dwiat, Kpær ka Sah Phawa, Salon Phawa, Khangkor, Dieniang, Surok Musniang Krem Labit.

Da khang leh ya i kreh mooyong ha waroh ki thaw wa tooid ka um cha ka Wah Umjhai (Moopun) wa Wah Myntdu.

Heijooh i por ka Dorbar Chnong da kyntu ko leh ya ki bor sorkar wow e yarap ya ka heiyatoh wa ini i kaam wow yada ya ka rymaw wei kamjooh wow pynmiat wei wow pynneh pynsah ya ki thaw uiñke hapoh ka chnong. 

Share this:
Previous

Daw khang ya ka Iew Langstieh, Mairang ha ka sngi nyngkong

Next

Khang ka Mihmyntdu wow e yung-wai ya kiwa na baar chnong