January 28, 2019

Rai ka Dorbar Soo Chnong wow kyrchaan biang ya u Rudaioo Tang kam u MDC na ka 11-Shilliang Myntang

Advertisement ad1

Jowai: Ka dorbar soo chnong (Musiaw, Umsalang, Latymphu wa Moobandu) da pynman ha ka 08-01-2019, ha Lum Dorbar Soo Chnong kawa da sakhi da ki spah ngut kiwa chong chnong yong ka.

Hadien wa da yatai sani bha wow bichaar bniah bha, halor ka yurim wow wanrah ya ka roi ka paar, ka bha ka miat, ka suk ka saiñ ha ka imlang sahlang hapoh kini ki soo chnong wa ya ka Constituency hi waroh kawi, lyngba i mynjur lang ki paidbah yong ka soo chnong, da iwi i sur wei da iwi i yumut da chim ki ya ka rai wow kyrchaan pura biang ya u Rudaioo Tang naka Party NPP kam u krtong MDC na ka 11-Shilliang Myntang Constituency, wow mihkhmat cha ka yung dorbar yong ka Jaiñtia Hills Autonomous District Council (JHADC).

Ya kani ka dorbar da pynlai da u Porit Lyngdoh uwa man kam u President ka soo chnong. Uwa da pdiang sñiawbha wei da e khublei u ya ki Waheh Chnong, Secretary chnong khamtam ya ki paidbah kiwa wan chimbynta chongchit iwa man ka daw wow pynman ya kani ka dorbar kawa jop.

Da yoh yei klam na ki Waheh Chnong yong ki soo chnong deiwa kyntu biang ya ki paidbah chong chnong yong ka soo chnong wow yatylli ki kamjoooh wow ya kyrchaan biang ya u Rudaioo Tang ha kani ka Election MDC 2019.

U Rudaioo Tang da pynsñiaw u yei sñiawngooh wa i sñiawkmen kawa khroo ya waroh kiwa chong chnong yong ka soo chnong kiwa da yoo biang ya oo wow pynyeiñ kam u kyrtong wow yaleh ha kani ka Election MDC ka wow wan.

Da paan u leh yei kyrchaan na ki paidbah yong ka 11-Shilliang Myntang Constituency wow e laad biang ya oo sa chisien ha kani ka kynti.

Chwa wow chong u da pynkut da iwa ong ya kini ki kyntien “I jop yong nga man ko leh ka jop yong phi.”

Ini toh katkam wa pyntip paidbah da u Poly Pyrtuh u Secretary ka Soo Chnong.