U President ka Hill State People’s Democratic Party (HSPDP), u K Phlastingwell Pangniang da ong u wa ka Party yieñ ko ha ka yurim wow wanrah ya i synchaar wa khooid deiwa pynrap wa hanlada ka HSPDP emlang ko ha ka sorkar MDA u yieñ bait ko wow kyntu ya ka sorkar jylla u synchaar deiwa khooid.
Hajrong i pynbaad wa em i baam-tooh wa joor ha kani ka sorkar khamtam i khayi mooyong tooh wa i kaam baam-tooh ha ka chnat bordiñ, u Pangniang da ong u wa ka Party da yaklam yillu bha ko yeini ha ka Central Executive Committee ynne ka sngi heiwa da chim ya ka rai wow yaklam wa ka sorkar wow khang pyrchah ko ya i khayi mooyong tooh.
Da ong u wa ka Party chaniah ko leh ya ki 2 ngut ki MLA ka Party wow yaklam yeini wa u Montri Rangbah ka jylla heiwa ka sorkar u lilam lut ko ya u mooyong khlem tre ha i rukom wa biang.
Hajrong i pynbaad baamtooh ha ka chnat bordiñ, da sñiawkhia u khamtam i kylliang ya ki CMD ha ka chnat MeECL, da kyntu u ya ka sorkar wow pynbait biang noh ya i duna waroh.
