November 3, 2017

Rai ka JAC wa ym chah de ya ki kari na baar wow kamai hapoh jylla nadooh ka 9 tarik

Advertisement ad1

Shillong: Ka Joint Action Committee (JAC) on Indigenous People Economic Rights kawa kynthup ya ki seiñ kiwa yah truck, ka Meghalaya Commercial Vehicles Union, KSU Jaiñtia Hills, ka HYC, JSU, wa kiwi da rai ki wym chah de ya ki truck na baar jylla wow wan kamai ki hapoh jylla khlem yoh ya ka Trading License na ki District Council nadooh ka 9 tarik uni u bnai.

U Advicer ka JAC, u Peter Lawai da ong wa ka JAC da chim ko ya kani ka rai toh hadien wa ki ar tylli ki District Council wa ka tnat transport ka sorkar jylla ym em u leh ki iwon iwon wot hadien wa ka MCVU da dawa ko wow leh yeiwa emkaam hei yatoh wa ini.

Advertisement ad1

Da ong u wa katkam ka kyndon ki truck kiwa yoh ya ka National Permit ymye ki wow kit mar na kawi ka thaw cha kawi ka thaw hapoh ka jylla khlem yoh Trading License wa ka Special Permit tangwa toh u kit na kawi ka jylla cha kawi won ka jylla tangwa neidaw wa tlot ki District Council da wailaad ko ya kiwa na baar wow wan kamai hapoh ka jylla.

Heijooh i por u Chairman ka JAC, u Handle Mukhim da ong u wa lada ka sorkar wa ki bor wa toh u pait yeini ym jubab ki hapoh ka 10 tarik, daw chong yalang biang ki ha ka 9 tarik wei daw sdang noh u khang ya ki truck kiwa na baar jylla wow kamai ki cheini.