Shillong: Ka Parliamentary Party (PP) yong ka People’s Democratic Forum (PDF) ha KHADC da chim ko ya ka rai wow pynneh ya u Pynshngain N Syiem kam uwa yahkhmat ka PP ha KHADC.
Ya kani ka rai da chim ha ka yalang yong ki MDC ka PDF ha Nongrim Hills, Shillong.
Hawa yaklam wa kiwa pathai khubor hadien wa da kut ka yalang ka PP, U Chairman ka People’s Democratic Front (PDF) uwa man leh u CEM ka KHADC, u PN Syiem da ong u wa hadien da phyllu yumut hei yatoh wa ka District Council, neiliang ka PP da rai ko wa dang chaniah ya oo kam uwa yahkhmat ka PP.
Da ong u leh wa neiliang yong oo da kwah u wow pyllait noh ya ka kaam kam uwa yahkhmat ha KHADC wei wow kreh chitom neibynta ka People’s Democratic Front (PDF) tangwa da ong u wa neiliang ki MDC ka PDF dang kwah chwa ki ya oo wow man kam uwa yahkhmat wei wow pynche yeiwa pynbaad yong ka liang pyrchah hei yatoh wa ka poisa wa poi naka sorkar pyrdi.
Ha iwi tawon i liang u Pynshngain da ong u leh waka HSPDP wa ka UDP kiwa em ha ka liang pyrchah ha KHADC toh u krehlang ki neibhah ki emlang ki ha ka sorkar MDA wa yahkhmat da ka NPP wei ym ye u man wa ha ka sorkar jylla pyrchah ki ya ka Congress katwa ha ka KHADC won emlang ki waka Congress.
Da ong u leh wa lada emkaam wei lada kini ki Party ri-loom smat ki wow yakrehlang noh ha KHADC, ye leh wow pynkylla leh ya i pyrtuid yong ka liang synchaar ha KHADC neibhah ya ka ‘Forum’ ha KHADC da chna khnang neibynta ka ‘Front’ kawa man ka Party wa thymme.
Discussion about this post