Shillong: Ka sorkar Meghalaya Democratic Alliance (MDA) da rai ko wow pyrchah yei thmu ka sorkar pyrdi wow pynkylla ya ka aiñ chong chnong namo ka Citizenship Amendment Bill 2016, wow kheiñ tre ri ya ki ya ki Hindu, Sikh, Parsi, Buddhist, Khristan kiwa kheiñ khian paaid kiwa wan na ka ri Afghanistan, Pakistan wa Bangladesh wow wan sah ki cha India.
Ya kani da chim ya ka rai ha ka yalang ki montri ynne ka sngi kawa da chong pyrkhat sani ya kani ka Bill, hadien wa ka sorkar pyrdi lyngba ka Joint Parliamentary Committee (JPC) ka da paan yumut ko na ka sorkar jylla wei kamjooh na ki paidbah wow pynkylla ya kani ka aiñ.
Hawa yaklam wa u Symbood Montri Rangbah ka jylla, u Prestone Tynsong, da ong wa i pyrchah yong ka sorkar MDA wow pynkylla ya kani ka aiñ toh neidaw wa daw booh ko hei maa ya kiwa khian paaid khamtam hapoh ka jylla Meghalaya.
Da ong u wa ya kani ka rai daw phah cha ka JPC ka wa daw wan cha Shillong haka 10 wa 11 tarik uni u bnai.
Ya ka Citizenship Amendment Bill 2016 kawa toh kawa thmu wow pynthymme ya kani ka aiñ wa da chna nadooh u snem 1955, wei wow pynkylla ya ka da wanrah da ka sorkar BJP.
Sa kawi tawon ka rai toh wow pynku ya ka mang piosa ya ka Director ka Meghalaya Administrative Training Institute (MATI), u pynkylla ia ka Meghalaya Passengers and Goods Act 1962 heiwa u Contractor wa shim wai ya ki pooh chiloom, ki truck Dumper haap su dan ki cha ka sorkar. U Symbood Montri Rangbah da ong wa ya kani da leh yow khanglaad yei lai lait i dan wa toh u yoh ka sorkar.
Heijooh i por u Prestone da pyntip u wa da pdiang wow pynku tulop yong u Chairman ka Meghalaya State Electricity Regulatory Commission (MSERC) kawa poi kyrdan kat ka tulop yong u Chief Secretary kawa man T. 2.25 lak chi bnai.
Da pynkylla leh ya ka kyndon ka Meghalaya Compulsory Registration of Marriage Act 2015 deiwa pynkylla ya ka kyndon hawa Register ya ka chong kurim, wei daw thoh da uwa pynbia chisien chi snem cha ka sorkar wa cha ki Registrar.
Discussion about this post