Ka Dhab ki Montri (Cabinet) ka sorkar MDA da mynjur ko wow wanrah ya ki le tylli ki College ha ka jylla, ka Veterinary College, ka Dairy College waka Fishery College.
U Montri Rangbah ka jylla, u Conrad K Sangma da khana u wa ka Veterinary College waka Dairy College daw booh ha Kyrdemkulai, Ri-Bhoi District, katwa ya ka Fishery College daw booh ha Garo Hills ya kawa daw pyntip ya i thaw wa pura hadien wa dadep pynbiang ka chnat Fisheries.
Kawi won ka rai wa da chim ynne ka sngi toh hajrong i pynkylla (Amendment) ya ka Meghalaya District Court Ministerial Service (Amendment) Rules, wei yeini da leh katkam wa phah ka Meghalaya High Court.
Katkam i pyntip u Montri Rangbah, da ini i pynkylla, ki District Court daw pynman hi ki ya ki Interview wow thung kreh kamwa da leh da ki District Selection Committee, neibhah ha ki por wa da dep ya i thung kreh da leh bait da ka yung krehkaam ka High Court.
