Shillong: Ka sorkar jylla ynne ka sngi da rai ko wow chna sa kawi ka Committee ha ki Constituency neibynta wow yada na i poor smat ka khlam COVID-19. Ya ini i rai da pyntip da u Montri Rangbah ka jylla, u Conrad K Sangma hadien wa wai ka yalang wa ki MLA na East Khasi Hills District.
U Conrad da pyntip u wa yaka COVID-19 Committee ha ki Constituency daw khlieh hi da ki MLA, wei u ya krehlang ki wa ki Covid Management Committee kiwa da em chwa ha ki chnong waka chnat i chait i khiah yong ka jylla.
Katkam i ong u Conrad, i em kini ki Committee daw pynsuk ya i krehkaam hawa yatoh wa i yada ya ka jylla na i poor ka khlam COVID-19, neibhah wa kini ki Committee daw ya krehlang ki wa ki bor ki chnong ki thaw, ki bor pynlai yong ki District wa ki Block.
Da ong u wa ka yalang da yatai sani bha ya i lai luti yong ka jylla, hanla em i ku yong kiwa chah ktah ha ka khlam ha ki sngi wow wan neibhah ym ye wow tip chwa ya iyi wow jia. Da pyntip u leh wa neiliang ka sorkar da chim ko yei e yumut yong waroh ki MLA, nalor wa da chim leh ya ka rai wow pynsñiawthooh cha ki paidbah wa bha wow leh ya ka Home Quarantine neibynta kiwa chah ktah.
Ha i jooh i por, u Conrad da ong u wa ka yalang da chim ko leh ya i rai wow pynkhlan chooh chooh ya ki Community Quarantine Centre wei kamjooh wow pynboon ya ki Corona Care Centre ha kylleiñ ki District ka jylla khamtam kitu ki thaw wa em boon kiwa chah ktah ha ka khlam.
