Shillong: Ka sorkar jylla ynne ka sngi da rai ko wym pu chah ya kiwa chong dai madan wow sdang ya i kaam yong ki hapoh ka jylla, tangwa neiliang ka sorkar ha ka Review Meeting wa da pynman ynne ka sngi da rai wow phah yaka chnat Urban Affairs kammon wow pynbait yei eh kiwa chong dai madan.
Hawa klam ynne ka sngi wa ki laad pathai khubor, u Montri ka sorkar jylla wa pait yaka chnat i chait i khiah, u Alexander Laloo Hek da pyntip u wa ka sorkar hadien wa da bichaar bniah, da rai wym pu chah wow wai yaki dukan dai madan, tangwa ka sorkar da ekti ko ha u Chief Secretary wow yaklam waka chnat Urban Affairs kammon wow pynbait ya i eh wa yachem kiwa chong dai madan khamtam nadooh wa da sdang ka Lockdown.
Hawa kylli, u Hek da pyntip u wa ka sorkar da yaklam ko leh hawa yatoh wa ki skur, tangwa ya kattæ da chim yaka rai wym pu wai deiwa booh ya i chait i khiah yong ki khynnah hakhmat.
Kyntu ka Lympung ki Hynriew Shnong ya u CS wym chah ya kiwa chong dai madan
Ka Lympung ki Hynriew Shnong, wa kynthup yaka chnong Umsohsun, Mawkhar, Wahingdoh, Riatsamthiah, Mission Compound wa Wahthapbru leh ynne ka sngi da yachem ki ya u Chief Secretary ka jylla, u MS Rao wow kyntu yaka sorkar wym pu toh u chah ya kiwa dai madan wow wai ki.
Hawa klam wa ki laad pathai khubor, u President ka Lympung, u Paul Sawian da ong u wa i wan wow kyntu ya u CS toh hadien wa da yoo yei boon palat kiwa chong dai madan kiwa da pynwit yaki sarok wa ki luti lai ki bru, hanla ka chnong da pyrchang ko wow pynbait, tangwa ym ye wow pynhun ya kiwa chong dai madan.
Da ong u wa neiliang ka Lympung da pynsñiaw ko wa pyrchah wa em kiwa chong dai madan nadooh Motphran ter ter chadooh ka sarok GS Road, Mawkhar, ki luti lai kjat cha Wahthapbru, Mission Compound wa kiwi ki bynta kiwa haap hapoh kitai ki 6 chnong, deiwa pynsñiaw leh wa i em ki thaw dai baam harood sarok ym em pynchngaaiñ ko ya i chait i khiah ki paidbah.
Ha i jooh i por neiliang kiwa yahkmat kitai ki chnong da ong ki wa ym yohsa wow pyrchah yow lait na i khynnia yong ki sarok khamtam wow lait na i maa ya i chait i khiah naka khlam COVID-19.