Shillong: Yow pyntikna wa ki National Party khamtam ka BJP wa ka Congresss ympoi ki heibor synchaar hadien ka election 2018, ki ar tylli ki party ri-loom, ka HSPDP wa ka UDP da chim ki ya ka rai wow mylliñ noh ya i kawang ktieh ha ki por wa da dep wei wow krehlang noh neibynta ka MLA election.
Ini i rai hapyrdi kini ki party ri-loom toh kawa kongsan bha hapoh ka jylla neibhah ye wow sooh kse leh wow yatylli leh kiwi ki seiñ ri-loom waroh wa em ha ka jylla.
Hawa yaklam wa kiwa thoh khubor, u President ka UDP u Dr. Donkupar Roy da ong wa da yatylli kini ki ar seiñ da iwi i sur wow krehlang ha kani ka elction kawa tip dei ktien pharang kam ka Pre-Poll Alliance.
Yow pyntikna yei sñiawthooh yumut da chna leh ya ka HSPDP-UDP Coordination Committee ka wow khlieh da u Dr. Donkupar Roy kam u Chairman wa u Ardent M Basaiawmoit wow man u kam u Co-Chairman ka Committee najrong ki Secretary wa kynthup ya u A.F. Dkhar na UDP, wa u Kara Shen na ka HSPDP wei waroh ki MLA yong kini ki artylli ki party u man ki ki dkhot ha kani ka committee.
U Dr. Donkupar Roy da ong u wa kani ymtoh ka sien wa nyngkong wa ki seiñ ri-loom u krehlang wei ha ki por nachwa da em i pyrchang da em iwa jop wei em wa tyngkhoh boon i eh i khoo.
Da kam u wa da ini i yakrehlang daw jop hadooh 35 ngut ki MLA ha kani ka election wow wan khnang yow yoh synchaar ki khlem emkaam wow krehlang wa kiwi de ki seiñ sain pyrthai.
Hei yatoh won wa ka People Democratic Party (PDF) ka seiñ saiñ hima kawa dang thymme, u Dr. Donkupar da ong u wa hadooh katni leh ympu em tipmit ya kani ka party neibhah hadooh uwa yahkhmat yong ka u Pynshngain N Syiem, dang man u u Congress uwa dang chah suspend donhi. Heijooh i por da khut u leh ya kiwi ki seiñ saiñ hima ka jylla wow wan yakrehlang wa ki.
U President ka HSPDP u Ardent M Basaiawmoit da ong u wa kani ka sngi toh ka wow sahkynmoo ha ka jylla neibhah ym jooh em ka yakrehlang ki seiñ ri-loom chwa wow yakhun Election wei ka rai ynne ka sngi da man ko ka khubor wa bha ya ki paidbah.
Da ong u leh wa i krehlang yong ki seiñ saiñ pyrthai ha kani ka kynti rap phær ko na ki por nachwa neibhah wa katni ki MLA ymye de ki u phet party katwa sñiaw hun ki neibhah da em ka aiñ Anti-Defection Law.
Waroh kini ki wa mihkhmat da kyntait ki ini toh iwa e yumut u HS Shylla uwa rai wow dam u yaleh Election lada ya tylli ki seiñ saiñ hima ri-loom. Da ong wa i yaklam ha pyrdi ka UDP waka HSPDP da sdang ko nachwa wa pynsñiaw u HS Shylla wa emkaam yei yatylli.
Discussion about this post