Rai ka yung dorbar wow dawa pyndam ya ka hukum challan masi ka sorkar u Modi

Shillong: Ka yung dorbar chna aiñ ka da chim ko ya ka rai wow dawa na ka sorkar India wa yahkhmat ka BJP, wow pyndam noh ya ka hukum hei yatoh wa i dai næ challan wei wow tynyap ya ki masi ha kani ka jylla. Ya ini da klam ha ka dorbar wa kyrpang ka sorkar jylla ynne ka sngi.

U Montri Rangbah ka jylla, u Dr. Mukul Sangma hawa klam heiyatoh wa ini i pynbna ka sorkar NDA da ong u wa i leh yong ka sorkar India lyngba ka tnat Forest, Environment and Climate Change, kawa da pynmih ha u bnai wa da dep, wei katkam ka Prevention of Cruelty to Animals (Regulation of Livestock Markets) Rules 2017, em boon ki bynta wa tkoh ko kiwa ktah ya ki paidbah.

Da ong u wa i leh ka sorkar India da ktah joor ko ya ki paidbah ka thaiñ mihsngi ka ri India.

U Mukul da ong u wa ini i leh ka sorkar pyrdi da thombor ko yei hok ki jylla wei kamjooh leh ya ka riti synchaar ka ri.

Related posts

Yieñ ki kari syad dor ha JHADC tangwa yeiwa emkam dooh wei ym yoh poisa

July 24, 2025

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Waroh kiwa klam ha kani ka dorbar da iwi i sur rai ki wow pyrchah ya kani ka hukum ka sorkar India.

Neiliang u Dr. DD Lapang da pynsñiaw u yei mynsien wa kmen heiyatoh wa i yaksohkti ki MLA neiliang ka liang synchaar wa kiwa neiliang pyrchah.

“I kyrchaan ki MLA ka liang pyrchah ya ka sorkar hajrong kani ka phang pynyoo ko yei yatylli yong ki heiyatoh wa i im i yap ka jylla deiwa booh harood ya i sñiaw phær seiñ” da ong u Dr. Lapang.

Ki MLA ka liang pyrchah kiwa da kyrchaan ya ini i thmu ka sorkar toh u Paul Lyngdoh, u Ardent M Basaiawmoit, u Dr Jemino Mawthoh, u KP Pangiang, u Embhahlang Syiemlieh, u Witting Mawsor, u Dios Jyndiang, u James K Sangma, u Tituswell Chyne, u J Lesley Marak, wa u Saleng Sangma.