Jowai: U montri ka chnat PWD Building ka sorkar jylla uwa man leh u MLA ka 3-Raliang Constituency u Comingone Ymbon, hawa yaklam wa ki laad pathai khubor ynnin ka 10 tarik heiyatoh i sah i pynkehkaam yaka Greater Raliang Water Supply Scheme (GRWSS), da pyntip u ha ka yalang wa dang dep pynman hei emlang u montri ka chnat PHE wa ki sahep sorkar wa da chim ya ka rai wow pyndam noh ya u Contractor wei ya ka kaam wa dang sah u khut noh daka Tender kawa thymme neidaw wa slem wow pyndep kreh.
“Hei yong sakhait ya kani ka Project da mang wow pyndep nadooh u snem 2014 tangwa neidaw wa hadooh katni ym ye u pyndep ka nga da chim khia O wow khut ya ka yalang wow rai u pyndam noh ya u Contractor wei ya ki kaam wa da dep leh u daw su ya oo katwa ya kiwa dang sah won u e noh cha kiwi.” Ong u Ymbon.
Heiyatoh won wa i lut i sep da ong u wa em ko ka yaphær wa malu mala tangwa ym ktah ko neidaw wa boon ki tiar da dep thied chwa nadooh ki Pipe wei sah sa du wow pyndait ya ki, ka Pump House leh da dep chna sah sa wow pyndait ya ka Pump, ka Treatment Plant leh da dep chna sah sa tang wow pynbaing ya ki dawai pynkhooid um wa kiwi kiwi iwa mut 70 percent da dep wow chna wei sah sa kamwa 30 percent u pyndep.
Kam wow pynkynmoo ya kani ka Project da booh moo yurim nadooh u bnai Naisan (May) yong u snem 2010 da u montri ka chnat PHE u Prestone Tyngsong wei ya ka poisa da yoh na ka chnat ka sorkar pyrdi ka Ministry of Development of North-east Region (DoNER) kamwa T. 21.26 klur yow pynpoi um cha 29 tylli ki chnong yong kani ka thaaiñ yow pynkreh ya ka GRWSS wei ka poisa hi poi ko na Non Lapsable Central Pool of Resources (NLCPR).
U Coming da ong u leh wa kani ka kaam saam um yong ka chnong Shangpung u ye u pyndep ya ka 99% wei sah kattu wow chan ya ki Quater namo ki thaw sah kiwa kreh.
Discussion about this post