U Montri Rangbah ka jylla Meghalaya u Conrad Sangma da kyntait u wa da yah bahkla u yaka yung dorbar hajrong ka soskular pynpoi bordiñ wa da soi ka sorkar warim ka Congress waka NTPC, deiwa puræ leh ynne hapoh ka dorbar yaka soskular yow pynksan yeiwa da dep u wow ong chwa ini wa dep wa ka Congress da soi ko yaka soskular wa 25 snem.
Ya ini da hap leh ynne hapoh ka yung dorbar hadien waka u MLA ka liang pyrchah u Zenith Sangma da wanrah u yaka “Breach of Privilege Motion” pyrchah ya u Montri Rangbah deiwa kam wa da yah bakla u yaka yung dorbar.
U Conrad hawa e yei jubab da ong u leh wa haka soskular da klam che wa u krehkaam ko nadooh wa dep u chna ka Unit wa khaddooh ka thaw pynmihbordiñ kawa da pyndep u chna ha u 2019 wei ka bai bordiñ wa hap u su noh T. 11.8 klur chi bnai wei ha ki 25 snem daw poi ko palat T. 3000 klur lada chim næ ym em chim bordiñ.
Chooh chooh u Conrad da pynksan u ya ini deiwa ong wa da yoh Bill bai bordiñ ki naka NTPC kawa T. 11 klur kamtæ heiwon i rukom wa da yahbakla yaka dorbar.
Hajrong i dor kawa da hap su bait namo ka Fixed Charge, u Conrad da ong u wa neiliang u MLA ka liang pyrchah u Zenith Sangma leh da mynjur yeiwa em kam ini iwa hap su.
U Conrad da pynche u leh wa neidaw wa i bai bordiñ ka NTPC da syad ware i, ym em wa bien wow thied yei bhah wa da booh neibynta ka Meghalaya iwa ye u pynlait yaka jylla nei su cha ka NTPC, iwa pynman wa katni kani ka bai bordiñ wa hap su da poi ko T. 531 klur du naka Fix Charge wa kiwi ki kuna wa da toh neidaw wa slem u su.
Da ong u leh wa ki kyndon ym em e bor ko yaka MeECL wow pyndam ya kani ka soskular wei du ka NTPC kawa ye wow pyndam ya kani ka soskular wei lada mynjur ka NTPC wow pyndam ya kani ka soskular, ka MeECL daw hap hi ko wow pteiñ wow su ya ka bai bordiñ namo ki Fix Charge hadooh wa poi katkam wa da ya mynjur wei u lait na ini du lada em kiwa bien wow chim yei bhah bordiñ wa da booh yaka MeECL.
Neiliang uwa yahkhmat ka liang pyrchah u Dr. Mukul Sangma da ong u wa i daw wa da wanrah ya kani ka ujor pyrchah ya u Montri Rangbha wa da yahbakla u toh yow lait ko wow man kam ka nongmuna wa neini chakhmat wow e laad wow kdaw kti wei wow pynkit bait ya waroh iwa man katni du ha kawi donhi ka liang. Deiwa ong leh wa i bai bordiñ wa da mynjur wow su toh katkam ka aiñ Electricity Act wei kini ki Fix Charge toh iwa em bait ha kiwon kiwon ki soskular hawa thied bai bordiñ.
U Dr. Mukul ym em yoh u wow klam slem neidaw wa da yieñ u Symbood Montri Rangbah u Prestone Tynsong uwa da ong wa ya kani ka phang “Breach of Privilege Motion” da wanrah da u Zenith Sangma kamtæ katkam ka kyndon toh u yaklam du uwa wanrah wa uwa chah wanrah pyrchah wei lada e laad ya kiwi ym kut de ini i yaklam.
Kamtæ da kylli na u Zenith wa lada kwah u wow pyndam yaka Motion wa da wanrah u iwa da kyntait u neidaw wym yoh u ya i jubab wa hun.
Yow yoh yaka rai da paan yei mynjur naka dorbar kawa da rai wow kyntait yaka Motion.
Hadien ini neiliang u Prestone Tynsong uwa man leh kam u Parliamentary Minister da yieñ u wow ong wa neidaw ka Motion wa da wanrah toh kawa khlem yurim, katkam ka Rule 173 toh u pyndaiñ kuna T. 500 ya uwa ujor deiwa pynksan leh neidaw waka yung dorbar da kyntait ko ya kani ka Motion wei neidaw wa lada ym leh kamni, neini chakhmat du na ki daw wa khian wa nai daw wanrah yaka “Breach of Motion” iwa ym jooh em yoo u kam kani nadooh u 2003 iwa da pynsepai yei por ynne ka sngi.
