U Conrad hawa e yei jubab yaki liang pyrchah kiwa da wanrah yaka No Confidence Motion da ong u wa kani toh kawa phær bha neibhah chwa wow ya Vote leh da ong ki wa ym sñiawtikna ki wow jop.
Da ong u wa da em kiwa ong wa ileh wa kani ka sorkar wa katni da nujor bait ko wa iwa leh ka sorkar warim, da ong u wa hap wow leh yeini yow pynyoo iwa wa em wa iyi wym em, wei ka liang pyrchah ya iwa bha da kam ki wa ki wa leh katwa ya iwa sih won da ong ka sorkar wa katni wa leh.
Hawa jubab yeiwa pynbaad ka liang pyrchah wa kini ki ar snem chiteiñ toh kiwa sih dooh hapoh ka jylla manda toh wow pynkrehkaam yaka aiñ, u Conrad da ong u wa nadooh u 2015 hadooh u 2017 da em 66 ngut ki dkhot ki seiñ kieñ suloi kiwa chah pynyap katwa nadooh u 2018 hadooh u 2020 da em 3 ngut ki dkhot ki seiñ kieñ suloi kiwa chah pynyap. 36 ngut ki bru paidbah kiwa chah pynyap nadooh 2015 hadooh u 2017 katwa nadooh u 2018 hadooh u 2020 da em du 4 ngut kiwa chah pynyap. 9 ngut ki pulit kiwa chah pynyap nadooh u 2015 hadooh u 2017 katwa ha u 2018 hadooh u 2020 da em uwi donhi. Ki bru paidbah kiwa chah rah bor da em ki 210 ngut nadooh u 2015 hadooh u 2017 katwa ha u 2018 hadooh u 2020 ym em uwi leh.
Heiyatoh won wa da ong ka liang pyrchah wa da em ka sñiaw yaphær jaitbru kawa ym jooh em nachwa, u Conrad da pynkynmoo u wa ha u snem 2013 da em kiwa kawang Petrol Bomb haki Puja Pandal ha Umsning, Ri Bhoi heiwa ha uni u snem ka lehniam Puja man ko kawa lai bait. Kamjooh ha ka 27 tarik u Naisan u 2017 da jia ha Laban, ha Nongmynsong, ha Rynjah, ha Lumdiengjri da em i kawang Petrol Bomb wei kamtæ wow ong wa ha u 2020 toh iwa sih dooh toh iwa bakla lym toh wa da bha bar ya nachwa.
Hajrong u mooyong da ong u wa uwa kit toh uwa chah kem uwa chalan tooh iwa da leh katkam ka aiñ MMDR Act wei na uni u mooyong ka sorkar yoh nong ko neibhah ka poisa wa yoh ym em man ko du naka bai Royalty, da yoh leh wow dai ya uni u mooyong neibhah uni u mooyong wa kem da man u u yong ka sorkar.
Da kdaw u leh wa haka CAG Report i dooh nong ka sorkar nei khayi tooh ya u mooyong uwa da poi 27.87 lak MT nadooh u 2013-14 hadooh u 2017-18 da poi ko chei dooh nong wa T. 180 klur yaka jylla wei ini da jia i heipor wa ka liang pyrchah kawa synchaar yaka jylla. Tangwa katni da klam ki yei chah lute ka sorkar, i dooh nong ka sorkar wa i mynried ka mankawi ki khon yong i tangwa ha kitu ki por nadooh u snem 2013 ym em pyrkhat ki ya ini. Wei soo snem ym em leh ki iyi iyi leh yei khang ka NGT wow tih mooyong tangwa manda poi ka sorkar wa katni da pynksan hadooh ka Supreme Court yei mantre ki jaitbru ri-loom yaki mar poh khyndaw wei da chah biang wow tih mooyong katkam ka aiñ.
Heiyatoh wa ki LP School da pyntip u wa da booh T.300 klur yow pynmiat pynbha ya kini ki skur.
Da khut u leh ya ka liang pyrchah wow ya krehlang wei wow kyrchaan yow pynku yaka jylla Meghalaya.
Neiliang u Lamphrang ka yung dorbar u Metbah Lyngdoh da e laad u ya uwa yahkhmat ka liang pyrchah wow pyndam noh ya ka No Confidence Motion heiwa u Mukul da kyntait u neidaw wa ka sorkar ym bien ko wow e yei kular wow pynbha ya waroh ki kaam wa tkoh heiwa u Conrad da ong u wa da dep u wow pynche lut, kamtæ da booh noh cha ka Vote deiwa pynsawa yei sur (Voice Vote) heiwa kiwa pyrchah yaka No Confidence da jop ki dei wym pdiang yaka.
Ha chwa ini waroh, ki dkhot ka yung dorbar kiwa em haka liang pyrchah da yieñ ki wow kdaw yeiwa tlot ka sorkar, katwa kiwa em ha ka liang synchaar da yieñ ki wow khana yaki kaam wa bha wa da leh sorkar.
Kani ka yatai toh kawa da neh hadooh 7 kynta.
