Ka High Court ka Meghalaya ynne da chong bichaar ko ya ka mukotduma PIL wa da yaleh da u Greneth M. Sangma heiyatoh waka Roster System kawa da pynkrehkaam neibynta ka Reservation Policy.
Ka yung bichaar da ong ko wa uni uwa yaleh mukotduma kwah u du wow kynroi ya ka um kawa da ktieh chwa.
Hajrong ini, ka High Court da pynche ko wa ha u snem 2022 deiwa toh-ti-toh hawa chong bichaar ka Division Bench kani ka yung bichaar, wa hanla da pynkrehkaam ya ka Reservation Policy hapoh ka jylla nadooh 1972, ym em won pynkhreh ya ka Roster, kamtæ ka yung bichaar da chim ko ha ka hi wow pynbait yeini deiwa phah pynsangeh chwa yei thung kreh kat wym pu em pynkhreh ya ka Roster System wei da pynmih ko kattu katni ki hukum kiwa yatoh wa ini.
Hadien wa da chem wa dadep pynkhreh ya ka Roster System ka yung bichaar da rai ko wow pynkut noh ya ini i kaam khlem da paitbniah yei rukom pynkhreh ya kani ka Roster tangwa man ko kawa da pynhun ya ka booh bhah (Reservation) kawa 85% kawa da em hapoh ka jylla.
Kamtæ da ong wa emkaam ya ka sorkar wow chong pyrkhat ki yei pynkrehkaam ya kani ka Roster tangwa ka sorkar won ym pu em chim ko ya kawon kawon ka rai heiyatoh nadooh kiwon ki tarik u sdang kheiñ ya kani ka Roster wei ini kattu chong i ha ka sorkar wow chim ya ka yurim wa skem wow yieñ ki wei uwon uwon uwa chong chnong wa chah ktah da ini ye ki wow pynsñiaw yei wym hun ki katkam ka aiñ
Ya katni chooh kat wym pu em chim ka sorkar ya iwon iwon i rai wei dang yaklam yeini, kamtæ ya kani ka PIL wa dang yaleh thymme ym pu pdiang ka wei ym pu yaklam leh lada toh kawa biang namo ka wym biang wei ka yung bichaar lada khut ya ka daw pait ko ya ini i kaam ha iwi won i por.
