U Montri Rangbah ka jylla, u Conrad K Sangma ynne da booh mooyurim u wow chna pynmiat ya ka State Central Library Complex, Shillong ha ka yalang wa man ha U Soso Tham Auditorium hei emlang u Montri ka chnat Arts & Culture, u Paul Lyngdoh.
U Conrad hawa e yei klam da ong u wa ka sorkar thmu ko wow chna thymme ya ka Soso Tham Auditorium ha ki snem wa dadep tangwa da thut i nei wan ka khlam COVID-19 wei hanla kattæ leh da ye wow pynmiat ya ka hadien boon tylli ki snem.
Da ong u wa ini i pynthymme ya ka daw ye u wanrah ya i kylla katkam ka juk wa katni wei daw chna pynmiat ya waroh kawi ka State Library Complex heiwa daw hoi leh wow pynyoo phlim, u leh Drama wa kiwi kiwi wei da kular u leh wow booh bhah ka poisa neibynta ini.
Chooh chooh da ong u wa emkaam bha wow em i thaw wa ki bru wa em sap u yoh ki wow pynyoo yei sap i phong yong ki.
Da ong u wa lyngba ka CM Elevate, ka sorkar daw pynchlur ko wow chna 30 tylli ki baiscope (Cinema) ha kylleiñ ka jylla wow pynchlur yei chna phlim khamtam ha ki ktien wa klam hapoh ka jylla.
Heijooh i por da ong u wa ynne ka 6 tarik toh i dap chisnem ka sorkar MDA-II wei man i leh i dap ynru snem ka sorkar MDA, da pynrap u wa ka sorkar da booh ko ya ka luti wow wanrah ya ki kaam pynroi hapoh jylla wei kyrmen skem u wow pynhun ya iwa kwah wei angnood ki paidbah ka jylla.
Neiliang u Paul Lyngdoh da e khublei u ya u Conrad uwa chynna jngai wei uwa kreh wow pynku ya ka jylla wei da e khublei u leh ya ka National Library Board wa da e ko Rs. 2.33 klur wow chna pynmiat ya ka State Library Complex. Da pynksan u leh wa emkaam bha wow pynchlur ya kiwa pynmih phlim napoh ka jylla.
Da ong u leh wa ka Shillong man ko kawa mahajon ha ki lehke Drama wei emkaam u pynkhai im biang ya ini neibhah kiwa uiñke suwari hei sngi daw lai ki cha kiwa boon ki thaw ki bhaw tangwa heipor miet emkaam thaw ki wow pynwyrngia kam deiwa pait phlim wa ki Drama.
Ha kani ka sngi da pynphooh ya ka yalang da ki chaad wa ki rwai.
Discussion about this post