U Montri Rangbah ka jylla, u Conrad K Sangma, ynne da ong u wa ka ram yong ka sorkar jylla hadooh ynne man ko Rs. 20,000 klur wei du ha uni u snem katkam ki kyndon ka sorkar India, ka sorkar jylla ye ko wow chim ram Rs. 3500 klur.
Hawa pynche da ki kyntien wa rap suk kiwa boon u sñiawthooh, u Conrad da ong u wa ka ram kawa ka sorkar da chim ko toh katkam ki kyndon wei katkam wa ye i bor yong ka, wei ym em iyi iyi wow khuslai da kamwi won. Kamwa man kattæ, ka sorkar jylla ye ko wow chim ram 3.75% kamwa da booh ka sorkar India.
Hawa klam wa kiwa thoh khubor ynne ka sngi, u Conrad da ong u wa ka mang tangka ha uni u snem 2023-24 man ko Rs. 27,000 klur wei na kani, ka sorkar jylla da yoh poisa na ki dan ka sorkar India kamwa Rs. 10,000 klur katwa ka dan wa da pynmih na ka jylla hi man ko Rs. 4000 klur. Em leh ki Scheme kiwa da e da sorkar India kam ka JJM, kawa dapoi chadooh Rs. 6059 klur. Da em leh ka Grant na ka sorkar India kawa dapoi cha ka Rs. 3000 klur najrong ka ram kawa ye u chim kawa Rs. 3500 klur lyngba ki chnat waphær waphær lyngba ka RBI.
Da ong u wa ka sorkar jylla ye ko wow chim na ka Special Assistance of Capital Investment kawa 50 snem, heiwa ka sorkar ym emkaam ko wow su iyi iyi ya ka sut tangwa yow su won ya ka tre hadien 50 snem kawa e khnang ka sorkar India.
Hajrong ka ram na ka World Bank, u Conrad da ong u wa hei yongsakhiat ini ymtoh ka ram kawa chim ka sorkar jylla tangwa toh kawa chim ka sorkar India wei ka sorkar jylla hap ko wow su 20% da ka katwa 80% da tip hi ka sorkar India wei da ong u wa lada yoh rap boon, ka sorkar daw chim ko rap boon.
Katkam wa ong u Montri Rangbah, la chim ram katkam ka kyndon yow pynchna ya ki kaam pynroi ha ka jylla wei wow kyntu ya ka roi ka paar, ka ram ymtoh kawa hap su, tangwa chong hei ye wow chim katkam ka kyndon kawa da chah wow chim. Da em leh ka bynta kammon ka sorkar ye ko wow chim ram ha ki snem wow wan leh wei ha kini ki snem wa da lai, ka sorkar ym jooh pynsahteiñ ko wow su ya ka ram.
Da ong u wa ka sorkar ym ye ko wow lai palat ya u pood wa ka sorkar India da booh ko kamjooh leh ka Reserve Bank of India. Da ong u wa i chim ram ymtoh kawa sih, wei ka chim ram toh yow pynku wei pynheh ya ka roi ka paar wei ka sorkar jylla ym jooh pynsah ko yei su hadooh katni.
U Montri Rangbah ryngkat u Commissioner & Secretary ka chnat Finance ka jylla, u Dr. Vijay Kumar da pynche ki leh hajrong i mih ha ka Report u Comptroller Auditor of General of India (CAG) kawa da klam chaphang ka ram ka sorkar jylla heiwa da ong ki wym em i maa neibhah toh hapoh u pood wa toh u chim.
Da pynche leh wa kani ka Report ka CAG toh kawa rap nachwa tangwa ym em kheiñ ya ka Report wa thymme yong ka sorkar, wei na ini i daw u CAG da kdaw u ya kiwa ka sorkar ym pu em pyndep ko.
Discussion about this post