Ynne ka sngi ka Jaiñtia National Council (JNC) Central Executive Committee hapoh i yahkhmat u President, u Sambormi Lyngdoh da lai yachem ki wa u Kyrmen Shylla, MLA ka Khliehriat uwa man leh u Adviser ka chnat Mining & Geology ka sorkar jylla heiyatoh wa ka Meghalaya Environment Protection and Restoration Fund (MEPRF) kawa man ka poisa wa da pynlang neibynta wow pynneh pynsah ya ka mariang wei wow yarap ya kiwa chah ktah nei khang tih mooyong.
I yachem ynne man i kam chibynta ki kyndon krehkaam namo ka Guideline yong kani ka Fund wa 10% na ki kaam khayi (Transport) ya u mooyong na ki Challan toh u psiah chapoh ka Fund wow pynemkaam ya ka wow pynim ya ki thaw wa chah ktah na i tih mooyong wei kawa ar toh neibynta ki manyung wa chah ktah.
Hawa booddien lyngba ka RTI ka seiñ da kylli ko katwon ngut wa da yoh yarap wei iyi wa ka chnat Mining & Geology da leh ko neibynta kini ki bru, heiwa da yoh jubab wa ym em yukheiñ yeini namo “Not available”.
Kamtæ ynne ka sngi dei sñiawkhia ya kiwa chah ktah da lai ryngkat wa ka dorkhat cha u Adviser ka Mining and Geology wow phah ya ki District Level Committee wow leh yeiwa emkaam deiwa kheiñsap namo leh Survey ya ki manyung wa chah ktah wei wow e yarap ya ki lyngba ka MEPRF, neibhah wa da chem wa hapoh ka Fund da em ka poisa Rs. 400 klur tam.
Chooh chooh ka JNC da ong ko wa ha i yachem wa u Chief Secretary ka jylla da khana u wa em ka MEPRF neibynta wow yarap ya kiwa chah ktah, kamtæ da kylli wa weileh wym em yarap ya ki manyung wa chah ktah neibhah i yoh i laa da hiar bha i ha East Jaiñtia Hills.
Heiyatoh wa ini waroh neiliang u Kyrmen da kular u wow chimkhia yeini wei wow rah cha u Minister ka chnat wow leh yeiwa emkaam.
Discussion about this post