Ka Ministry of Tribal Affairs ynne da pyntip ko wa ka Grant-in-aid neibynta ka jylla Meghalaya kawa man kam ka 2nd Instalment hapoh ka Post Matric Scholarship neibynta ki khynnah wa lai puræ kiwa man kam ki Scheduled Tribe neibynta u snem mang tangka 2023-24 da pynlait ka.
Ka Ministry da pyntip ko wa ka President ka India da pynlait ko ya kani ka poisa kawa dapoi Rs. 41,25,00,000 (soophaw-wi klur arphaw san lak) ka wow phah noh cha ka sorkar Meghalaya yow ye ko u su noh ya Scholarship ki khynnah.
Neiliang u Montri Rangbah ka jylla, u Conrad Sangma da pyntip u wa neiliang ka sorkar u leh smat ko wow phah noh yaka Scholarship.
Kam wow pynkynmoo wa ini wa dep da em ki seiñ kiwa da maham yakhih neidaw wa slem u pynlait Scholarship heiwa neiliang ka sorkar jylla da jubab ko wa dang yang yaka bhah ka sorkar pyrdi neibhah kani ka Scholarship man ko ka Centrally Sponsored Scheme wei hap u yang hadooh wa ye ka sorkar pyrdi wow pynlait yaka poisa.
Kiwa lai puræ da em ki palat 67,000 ngut kiwa toh u yoh ya kani ka Scholarship na ka sorkar wei i lut waroh neibynta ka Scholarship man ko Rs. 163 klur wei i rukom bhah poisa man ko 90% naka sorkar pyrdi wa 10% naka sorkar jylla.
Hadooh kattæ ka jylla da yoh ko na ka Ministry Rs. 34 klur ha ka 1st Instalment wei kattu haka 2nd Instalment da yoh sa Rs. 41.25 klur.
Discussion about this post