Ka mukotduma PIL wa yaleh da u Flaming B. Marak heiyatoh wa i pyndooh bordiñ wei duna bordiñ hapoh ka jylla Meghalaya, da chong bichaar biang ka ynnin ka sngi da ka Meghalaya High Court heiwa ka sorkar da e jubab ko wa i duna bordiñ na iwa ye u pynmih da hiar ko da 13% ha waroh kawi ka jylla.
Ka yung bichaar da ong ko toh u pyntikna wym em de ini i duna wei uwa yaleh mukotduma kamjooh kiwa chong chnong emkaam ki wow sñiawthooh wa ini i duna ymtoh iwa ym ye wow pyndap hapoh chi sngi wei em leh iwa hap wow pynchna wei i lut phut iwa chong hei rukom krehkaam ka sorkar.
Heijooh i por da ong leh wa ka sorkar toh u thooh laad ko wow chna ya ki thaw pynmih bordiñ kiwa khian neibhah ka jylla toh kawa em ki loom ki wah kiwa dap um waroh chi snem wei deiwa em kam kini ki thaw pynmih bordiñ wa khian daw duna leh i hap thyllem ya ki khloo ki kjam wei ye leh u chna katkam i emkaam ki chnong ki thaw.
Da phah leh wow pynkhreh da ka Blueprint kammon wow ye u pyndap yeiwa duna bordiñ neibynta ka 5 snem næ 15 snem chakhmat wei wow pynkhreh leh wow pyndap yeiwa daw ku i emkaam bordiñ neibhah ym ye wow leh heitæ i rukom wow biah Band-Aid donhi neibynta chibet chipor donhi khlem da pyndooh ya ini i kjut.
Da yooluti leh wa ka sorkar daw pynyoo ko yeini hakhmat ka yung bichaar yow lait biang u duna i pynmih bordiñ ha ki 5-8 snem wa daw wan.
Yeiwa dang duna, ka yung bichaar da phah ko yaka sorkar wow thied bordiñ na ka Open Grid lane na ki chnat ka sorkar pyrdi kiwa pahooh bordiñ.
Ka sorkar da pyntip ko leh wa ka Ganol Hydel Project toh kawa da krehkaam wei daw wai noh ya ka deiwa pura ha ka 1 tarik u Naisaphra uni u snem.
Ya kani ka mukotduma u chong bichaar biang haka 08-09-23.
Discussion about this post