Sa ha ka Vijay Hazare Trophy yoh spah Run u Kishan Lyngdoh yow pynjop ya ka Meghalaya

Ka Meghalaya da jop ko ya ka yalehke sdang ko ya ka Vijay Hazare Trophy 2025-26 Plate Group deiwa pynrem da 79 Run ya ka Mizoram ha ka yalehke wa da pynman ha Ranchi ynne ka sngi. 

U Arpit Bhatewara wa u Kishan Lyngdoh da kamai boon ki ya ka Meghalaya deiwa yoh spah Run ki heiwa da kamai Meghalaya da 291/10 na ki 49.5 Over hadien wa phah Bat nyngkong ka.

Ka Mizoram hawa e yei jubab da kamai ko 212/10 na ki 38.5 Over deiwa pynhaap Wicket u Akash Kumar Choudhury 6/44 heiwa le tylli da pynhaap u ha ka Over wa khaddooh wei daw yang Hat-Trick u manda kawan bol biang u sa chisien. 

Ya ka Mizoram da lehbha uwa kawang bol ki uwa tip kam u Karthik CA (Guest Player) uwa da yoh 6/49. Da pynhaap u ya u Arien Bonchang Sangma wa u Swastic Chettri yow ieh ya ka Meghalaya da 40/2 wei heini i por da wan u Kishan yow pynyoh lok ya u Arpit uwa da Bat nadooh wa sdang. 

Chirup da kamai ki 205 Run neibynta ka Wicket wa le wei da Bat ki chirup 34 Over heiwa u Kishan da haap u ha u Guest Player ka Mizoram, u KC Cariappa (3/46). U Kishan da kamai u 106 Run na ki 104 bol wa kynthup ya 11 tylli ki 4 Run wa kawi ka 6 Run. 

Related posts

Jop ka Diengchynrum ha ka Super Division, khlem em wa jop ha ka 1st Division ka EJHDFA

October 5, 2026

2nd Division TSA: Pisah Semi ka Lad Mukhla wa ka Mupliang

October 5, 2026

U Arpit da haap u ha ka Over wa bood wei oo leh da dat u 11 tylli 4 Run wa kawi ka 6 Run yow kamai 104 Run na 125 bol.

Ka Meghalaya kattu daw yachem ko wa ka Nagaland ha kani ka 26 tarik.

U Kishan kattu da yoh u le tylli ki spah Run ha ka Ranji Trophy, kawi ha ka Syed Mushtaq Ali Trophy (uwa nyngkong na Meghalaya wa yoh ya kani), kawi ka spah Run ha ka yalehke T20 wei kattu sa ha ka Vijay Hazare Trophy wei da man u leh uwa nyngkong na Meghalaya wow yoh spah Run kamni ha waroh kini ki yalehke.