Ynne ka sngi u heh ka TMC uwa man leh u Parliamentary Secretary ka Party kamjooh leh u MP ka Rajya Sabha, u Derek O’Brien hawa yaklam wa kiwa pathai khubor ha Jowai da ong u wa kani toh ka sien wa 3 wa wan u cha Jowai wei daw pteiñ chooh u wow wan neibhah wa ngait skem u wa u Andrew Shullai u man u kam u kyrtong ka TMC sa 15-16 sngi wei neitæ won daw man u kam u MLA ka Party wei da tikna bha ya ini.
Da ong u, “Kwah i wa u Andrew u man u kam u MLA ka Jowai wei da kular u wa ymtoh du i yoh ki ya u MLA tangwa wot ya oo leh kam u MP wow wan chakri ya ki paidbah ka Jowai”.
Chooh chooh da kular u wow wanrah 3 lak tylli ki kreh ha ka jylla ha kini ki san snem wow wan wei u yoh ya ki Scheme wa miat kam ka T. 12,000 man-u-snem cha ki manbei ka jylla wa ki khynroo khyllood ka jylla wei ya ini daw leh du hapoh 100 sngi.
U Derek da ong u leh wa daw e ya ka Student Credit Card kawa T. 10 lak cha ki khynnah heiwa u ye won ki ka u su ha ka sut kawa khian bha kamjooh leh ka Health Card kawa T. 5 lak cha waroh ki dkhot ka manyung heiwa kani ka Health Card toh u em ko hei pyrtuid ka manbei.
Da ong u leh wa ka TMC daw chimkhia ko ya i puræ puthi wa i chait i khiah.
Da khana u leh wa ki 40 ngut ki MP daw chimkhia ki yei kaam ka jylla heiwa ki MP da klam ki hadooh 6 sien hapoh Parliament heiyatoh wow kynthup ya i ktien Khasi ha ka 8th Schedule ka Riti Synchaar ka ri.
Heijooh i por da ong u wa waroh ki seiñ saiñhima hapoh jylla kiwa em ya u dak “P” mut i iwi don itæ toh u Pipe wei uni u Pipe toh u yong ka BJP katwa ka TMC toh kawa ye wow yakhun pyrchah ya ka BJP wei katni nei wan ka Election da pyndur ki wa yachruit ki para ki.
Da ong u wa ha ka thup krehkaam (Manifesto) ka Party da khana che leh kammon wow pynmih poisa ka sorkar ka TMC.
Chooh chooh da khana u wa ha ki san snem ki “P” kammon kreh ki wei yeini da rah ha Parliament nadooh i kaam baamtooh, ki kaam baamtooh ki pulit, i haap i tnoom kyllung ka yung Dorbar Chna Aiñ wa dang chna wa kiwi kiwi wei ki paidbah ha kylleiñ ka ri yoo ki kammon ka TMC ye ko wow chakri ya ki paidbah.
