Sa san tylli ki karkhana Coke e bor ka MSPCB u chna ha East Jaiñtia Hills

Ki waheh chnong ka Nongsning wa Umrasong da lai yachem ki wa u Member Secretary yong ka Meghalaya State pollution Control Board (MSPCB) haka 13 tarik u uni u bnai neidaw wa e bor ka Board yow chna namo ka Consent To Establish (CTE) ya san tylli ki Coke Plant kiwa pyrtuid M/S MM Minerals (yow booh ar tylli ki toskhana), ka M/S Unique Industry (yow booh ya u toskhana wa ar), ka M/s Presidium Breez (uwi u toskhana), ka M/s Magic Coke (ar tylli ki toskhana) waka M/S Ioanis Industries Private Limited (yow booh ya u toskhana wa ar) kiwa em hajan ka chnong Nongsning waka Umrasong, East Jaiñtia Hills khamtam hawa yatoh waka M/S Presidium Breez kawa daw pynsih ya ka tyllong um yong ka chnong Nongsning.

Neiliang ka Dorbar Chong Nongsning da dep booh ujor ko da boon sien nadooh u snem 2022 cha u Deputy Commissioner ka East Jaiñtia Hills wa kiwi kiwi ki chnat deiwa yooluti wym toh u e CTE ya kini ki Coke Plant neibhah wa pynsih ki yaka la-ær wa yaka tyllong um kawa waroh kiwa chong chnong da pynemkaam ki.

Tangwa kiwa chong chnong da khyrngiat ki wow yoo yei sdang pynkreh biang ya kini ki Coke Plant ha kini ki sngi wot hapyrdi i ujor wei yakhih pyrchah yei e bor ya kam kini ki karkhana. Wei da tip wa u ha u snem 2023 kini ki Coke Plant dah yoh CTE ki wow chna ha kani ka chnong.

Ini da pynyoo wa ka sorkar ym mano wei wym ap ko yeiwa ood wei pyrchah ki paidbah wow booh ya kini karkhana.

Related posts

I pynbna wa emkaam neibynta kiwa kwah u chimbynta ha ka 1st Miss Latuber Beauty Contest 2024

November 21, 2024

Chem uwa lai puræ PhD uwa na Nongjngi ya ka dakha wa thymme ha Lakroh

November 20, 2024

Kamtæ da i mynsien wa sñiaw diaw yei wym ap ka sorkar, neiliang u Dipsing Bareh, waheh chnong Nongsning, u Elias Tlang, waheh chnong Umrasong, u Maniwel Suja (uwa chong chnong ka Nongsning), u Reading War, Advisor ka ECC deiwa emlang ki Secretary chnong da lai yachem ki markhmat ya u Member Secretary ka MSPCB yow paan pynche heiwa u Member Secretary da ong u wa daw pait bniah yeini i kaam wei daw e jubab hapoh uni u bnai.

“Lada ka MSPCB ym ye ko pyndooh yeini i eh, kiwa chong chnong ym yohsa ki wow chim da kawi won ka rai wa khor,” da ong u Dipsing Bareh.

“Lada dooh i ya kini ki tyllong um daw wanrah ko yei eh wa khroo ya kiwa chong chnong neibhah du kini ki tyllong um wa hoi u pynemkaam,” da ong u Maniwel Suja.

Puræ leh: Em ki Coke Plant wa pynemkaam da u mooyong wa man pyrchah aiñ