U Montri Rangbah ka jylla, u Conrad K. Sangma ynne ha Tikrikilla, West Garo Hills da yachem u ya ki 288 tylli ki Producers Group namo ki seiñ ki warep kiwa yoh pdiang ya ki Cheque wa kynjoh T. 1.86 klur.
Hawa ekti ya ki Cheque da pdiang ya ki da ki Producers Group, Self Help Group wa kamjooh ki Cooperative Society hapoh ka Scheme FOCUS kawa e yarap cha ki warep.
Neiliang u Conrad da ong u wa ka sorkar sñiawthooh ko yei chah ieh mylliñ ki warep wei lyngba i yarap ka sorkar daw ye bha i wow kyntu kynrong yei yoh yong ki kamjooh wow pynlai ya ki mar cha ki yaw ki haat kiwa heh.
Da ong u leh wa nadooh wa sdang ya ka FOCUS da ka sorkar jylla wei hadooh u Wisu uni u snem daw saam T. 17.28 klur cha ki 1650 tylli ki Producers Group ha ka jylla wei chwa wow kut u snem mang poisa (Financial year) 2022-23 daw e sa T. 130 klur cha ki 16,800 tylli ki Producers Group.
Heijooh i por da ong u wa ka ‘FOCUS’, toh kawa heh dooh ka thong krehkaam ha i parom ka Meghalaya yow e yarap ya ki warep ka jylla wei ka 1 Kmaichonglad (Dec) u tip noh ya ka kam ka “Farmers Day” ka wow kynjoh ya ki 4.5 lak ngut ki warep ki wow yoh yarap naka sorkar.
Ha kani ka sngi, ha Tikrikilla, u Conrad da yaklam u leh wa kiwa yoh myntoi na ka PMAYG, MGNREGS, NSAP wa kiwi kiwi.
