Kam chibynta i sdang ya ka Rozgar Mela kawa man ka thong thung kreh ya 10 lak ngut ki bru kawa da sdang ynne da u Prime Minister, Narendra Modi lyngba ka Video Conference heiwa da e kti ya ki chithi thung kreh namo ki Appointment Letter cha ki 75,000 ngut ki bru.
U Prime Minister hawa e yei klam da ong u wa kani ka Rozgar Mela wa ki thied yong ka em ki wow pynyoh kreh wei wow pynchlur seiñ kreh hapoh ka ri ha kini ki 8 snem wa da lai. Wei deiwa kynmoo yei dap 75 snem i yoh laitlooid ka ri, ka sorkar pyrdi u saam ko ya ki chithi thung kreh cha ki 75,000 ngut ki khynroo hapoh kani ka Rozgar Mela.
Ha Shillong ya kani ka yalang da pyman heijooh i por deiwa emlang u Montri ka sorkar pyrdi wa pait ya ka Law and Justice, u Kiren Rijiju ha ka yalang wa pynman ha madan Polo, Shillong.
“Nga sñiawkmen O wow emlang ha kani ka sngi wa emkaam wei e khublei O ya kitu kiwa dang chah thung kreh thymme kiwa da pdiang ya ka chithi thung kreh. Ha u 2047 daw lehkmen i yei dap 100 snem i yoh laitlooid ka ri wei kini kiwa dang chah thung kreh ynne daw em ki yei bynta wa emkaam bha yow pynku ya ka ri,” da ong u Rijiju.
U Prime Minister da phah u ya waroh ki Ministry wa ki Department wow pyndap noh ya waroh ki kreh wa man thylli wei kini kiwa dang chah thung kreh ha kylleiñ ka ri daw psiah kreh ki ha ki 38 tylli ki chnat ka sorkar pyrdi wa kynthup ya ka Group-A, Group-B (Gazetted), Group-B (Non-Gazetted) wa Group-C. Kini ki kreh kyntup ki ha ka Central Armed Force Personnel, Sub Inspector, Constable, LDC, Steno, PA, Income Tax Inspectors, MTS wa kiwi kiwi de.
I thung kreh da pynman da ki Ministry hi lane lyngba ki UPSC, SSC wa Railway Recruitment Board.
