theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Saam khusnaam ka Dorbar Chnong Lumputhoi cha kiwa jop yakob pynlang Plastic

Ka Dorbar Chnong Lumputhoi, East Jaiñtia Hills District kam ka dak wow kynmoo wei wow lehwarom ya ka Gandhi Jayanti, ynne ka sngi da saam khusnaam ko cha kiwa chong chnong kiwa da jop ha ka Yakob Pynlang Plastic kawa ar ya kawa da sdang nadooh u snem 2021.

Neiliang ka dorbar chnong da pynsñiaw ko leh yei sñiawngooh ya ka yung krehkaam ka Swachh Bharat Mission(G), East Jaiñtia Hills District kawa da smat u yarap wei wow e yumut ya ka dorbar chnong chirup wa ka Village Water and Sanitation Committee Lumputhoi neibynta wow pynlai chaphrang ya kani ka kaam khnang yow wanrah yei khooid yei suba hapoh ka chnong ka thaw wa ki soodong sookun yong ka khamtam wa ka Bei Rymaw yow man ko kawa khooid wa jngiar.

Advertisement ad1

Ka thong yong ka dorbar chnong hi toh yow wanrah yei khooid yei jngiar hapoh ka chnong ka thaw. Kamtæ ha kani ka sngi da wan saam leh ya ki khusnaam cha kiwa jop da u Damewanhi Rymbai na ka chnong Wapung Skur uwa man leh kam u kyrtong wa daw e reiñ ha kani ka Election MLA wow wan ha u snem 2023.

Kawa yoh nyngkong ha kani ka yakob toh ka Beauty Lyngdoh kawa da pynlang 51.20 Kg wei da yoh ko leh waka poisa kawa T. 2000, ka Dina Lyngdoh da yoh wa ar deiwa pynlang 33 Kg wei da yoh ko ya ka poisa kawa T. 1500 katwa ka Ngaitlang Lyngdoh da yoh wa le ko deiwa pynlang 25. 57 Kg heiwa da yoh ko ya ka poisa kawa T. 1000 najrong ki 56 ngut kiwa da yoh yei e sñiawbha heiwa ka dorbar chnong da rai ko wow e sñiawbha ya kiwa yoh u pynlang 5 kilo chaneiñ ki Plastic kam i dak wow pynchlur ya ki.

Hadien kani ka saam khusnaam da em ka yalang wow pynsñiawthooh paidbah chaphang ka “Clean Politics Campaign” da u Damewanhi Rymbai heiyatoh wa ka yurim ka yong oo, uwa da batai bniah bha wa kammon u jied ya kiwa mihkhmat paidbah.

Ka dorbar chnong da e khublei kyrpang ko ya kiwa chong chnong waroh kiwa da kreh chitom u pynlang Plastic waroh chisnem kamjooh leh wa ha u snem wow wan daw pynheh chooh chooh ya ka khusnaam kiwa jop ha kani ka yakob.

Khlem da mylliñ, ka dorbar chnong da e khublei kyrpang ko ya u MLA ka thaaiñ, u Kyrmen Shylla wada smat u e sñiawbha da ka poisa cha ka dorbar chnong yow yarap ya ki paidbah wa ya chimbynta ha kani ka yakob pynlang Plastic najrong wa da pynlut na ka poisa ka chnong hi.

Advertisement ad1
Share this:
Previous

U chna ka USTM da ka PA Sangma International Medical College & Hospital

Next

Sdang ka e sikai wa 3 bnai hajrong ka Organic Farming ha Mukhaialong