Ynnin ka 29 tarik, u MDC yong ka 16-Shangpung Constituency, u J. Treilang Suchiang da saam u ya ki kor soor that cha ki SHG wa em hapoh ka Shangpung Pohshnong deiwa emlang u Waheh Chnong wa ki dkhot yong ki SHG waphær waphær.
Ha ini i saam tiar da yoh leh i klam wa kyrpang na u Waheh Chnong u Richardson Rabon, uwa da ong wa katwon sñiawngooh ya u MDC yei ye u wow wanrah ya ini i yarap hanla man i iwa khian leh, sñiaw dap dei kmen ha kam ini i bynta yow myntoi ki SHG hapoh ka chnong ka thaw wei lyngba kini ki kor daw yoh ki i laad wow esikai soor hapoh ka chnong ka thaw hi.
Hachwa wow sdang da em leh i ngooh Blai na ka Yoophi Iakai.
Da yoh leh yei klam wa kyrpang na ka President warim yong ka Bersaman VO Shangpung Pohshnong, ka Anjelina S. Manner kawa da e yei sñiawngooh ya u MDC, deiwa ong wa katwon dap dei sñiawkmen iwa khroo wa hapoh i pynlai yong ka wa ha u snem 2020 da em i dawa wow paan da kini ki kor soor that na u MDC wei ym em poi pyrkhat ko wow yoh sakhiat kamwa da paan ki.
Da ong ko leh wa katwon dap dei kmen sakhiat i mynsien wa da yoh ya kini ki kor ki wow pynyoh myntoi hapoh ka Bersaman VO, kamtæ da e ko yei khublei iwa khroo tam ya u MDC uwa da kreh chitom wow pynyoh ya kini ki kor hapyrdi i em ka khlam.
Ha chwa wow pynwai ya kani ka yalang, da e khublei kyrpang da ka Yoophi Iakai kawa man kam ka dkhot ka Bersaman VO Shangpung Pohshnong kawa da e khublei ya u MDC wa u Blai u nang theh u yei kyrkhu kyrdoh yow yoh u yei chait i khiah yow poi u leh cha iwa da mut da mang u yow ye chooh chooh wow wanrah ya kiwa boon jait ki Scheme yow nang ku chooh chooh ka chnong ka thaw.
