Kam chibynta wow yarap ya kiwa ri ngap lyngba ka Apiculture Mission hapoh ka jylla, u Montri ka chnat Agriculture & Farmers’ Welfare, u Banteidor Lyngdoh ynne ka sngi da saam u ki ksiñ ri ngap cha kitu kiwa da pliah wei chemphang wow ri ngap namo ki Master Beekeepers wei da pynlait u leh ya ka kot Mission Document of Apiculture Mission 2.0 ha ka yalang wa pynman ha Conference Hall, Directorate of Agriculture, Shillong.
Waroh da em 35 ngut kiwa ri ngap kiwa na Ri Bhoi District, West Jaiñtia Hills District, East Jaiñtia Hills District, East Khasi Hills District, Eastern West Khasi Hills District wa South West Khasi Hills District kiwa da yoh ya kini ki ksiñ ri ngap.
Kani ka yalang da pynman da ka Directorate of Horticulture, ka sorkar Meghalaya kam chibynta i lehkmen dap 50 snem ka jylla.
Hawa e yei klam, u Banteidor Lyngdoh da ban joor u yei emkaam wow ri ngap katkam i stat sayan yow ye u pynmih umngap chiboon. Hapoh ka Apiculture Mission 2.0, ka sorkar u kreh jan bha ko wa kiwa ri ngap wei wow ap yeiwa pynsñiaw ki. Da pynchlur u leh ya ki wow wan chakhmat wow yaklam wa ki sahep wa em ha ki jar jiat ki District yow yoh ki yei pynche ya iwon iwon i artatien.
Da pynsñiaw u leh yei thied toh dor yei umngap napoh ka jylla da ki Company kiwa na baar kiwa da pynsong da iwi wei da dai syad won ki, kamtæ da emkaam wow song wei wow e pyrtuid pyn-napoh ka jylla hi.
Da kdaw u leh yei duna i em ki ngap khamtam ha ki thaw wa man sor wei yei pynemkaam ya i sboh dawai, deiwa ban joor u yei emkaam wow yada wei pynneh pynsah ya rymaw yow myntoi waroh lang.
Hapoh ka Apiculture Mission 2.0 daw ya krehlang wa kiwa ri ngap wei wow chem leh ya kiwi ki Master Beekeepers, wei ha ka bynta wa nyngkong daw e mynkna ya ki ksiñ, wei ya kiwa dang chah sikai daw e 50% Subsidy wa 50% Interest Free Bank Loan.
