Ka sorkar jylla da booh thong ko wow pynboon ya ki kaam pynroi ha ki thaaiñ palatsor deiwa sdang u pynchlur ya kiwa seiñ kreh wei hapoh i yahkhmat u Montri Rangbah ka jylla, u Conrad K. Sangma da saam ya ki khon mrad wow psan kamjooh ya ka song poisa ha Raliang, Laskein Block, West Jaiñtia Hills District ynne ka sngi.
Da saam u leh ya ka song poisa wa T. 2.07 lak hapoh ka ‘FOCUS+’ kawa neibynta wow yarap ya ki warep (Farmer’s Welfare Programme) wa yoh myntoi ki 207 tylli ki manyung. Ka ‘FOCUS+’ da wanrah ya ka wow myntoi kiwa chong chnong ka jylla Meghalaya heiwa da wanrah leh ya ka ‘FOCUS’ (Farmers Collectivization for Upscaling Production and Marketing System). Ki ar scheme (Focus wa Focus+) daw yarap ko ya ki manyung kiwa im hei rep hadooh T. 10,000 samen chi manyung.
Wow myntoi ki Self-Help Groups ka Laskein Block da e ya ka poisa hapoh ka Community Investment Fund (CIF) wa T. 61.80 lak cha ki 10 tylli ki Village Organisations.
Ka yarap poisa won hapoh ka YESS Meghalaya cha ki seiñ khynroo kawa T. 5.40 lak da e cha ki 13 tylli ki seiñ khynroo namo ki Youth Groups ka Laskein Block wei kani ka Scheme toh da mang kyrpang du neibynta ki khynroo khyllood lyngba ki kaam chakri paidbah wa ki kaam yaleh Sports.
Hapoh ka Rural Backyard Piggery Scheme, ‘PROGRESS’, da e hadooh 1068 tylli ki khon sniang (3 kynthai wa 1 chynrang) cha ki 267 ngut kiwa psan sñiang na West Jaiñtia Hills District.
Katkam wa man hi ka ‘PROGRESS’ Scheme da booh thong wow myntoi hadooh 10,000 ngut hapoh ka jylla.
Hawa e yei klam, u Conrad da ong u wa dap u dei kmen wa khroo wow yoh ya kani ka laad wow e yarap cha ki warep, ki SHG wa ki khynroo ka West Jaiñtia Hills District. Wei ka sorkar jylla da kreh ko leh khlem sangeh yow pynku ya ka rukom im ki warep ha kylleiñ ka jylla Meghalaya. “Ka thong yong i toh wow pynyohnong noh ar chah ya ki manyung ki warep wa kiwa ri wei psan mrad. Du ha kini ki soo snem da ye wow pynwan dur ya chiboon ki Scheme kiwa e mynoyi ya ki warep ha kiwa boon ki liang.”
