Shillong: Da ki spah ngut ki warep na ki chnong wa ki thaaiñ wa marjan ka chnong Nongjrong wa Nohron ka Mawkynrew Constituency, da yoh pdiang ki ya u symbe murit na kti u MLA ka thaaiñ, u Banteidor Lyngdoh, uwa man leh u Myntri ka chnat Agriculture ha ka yalang kawa man ha chnong Nohron ynne ka sngi.
Ki warep ka thaaiñ da sñiaw khyrngiat wei da sñiawkmen ki wa u MLA uwa da pynkhreh neibynta yong ki da ki symbe thung murit uwa da ye dor bha ha yaw ha haat wei da man ko leh ka sien wa nyngkong wa yoh yarap ki neibynta i rep da u murit.
U MLA da wanrah u hadooh 4000 tylli ki symbe murit heiwa da ki spah ngut ki warep da yoh pdiang ki ya ini i yarap na u MLA. Ki thaaiñ wa marjan wa kini ki chnong da man chwa ki ki thaw wa mih bha u soh u pe nalor kiwi won ki jait rep wei lyngba i rep murit daw yarap chooh chooh ko ya ki warep.
U Banteidor da ong u wa man ko kawa emkaam wa ki warep ka thaaiñ u kyruiñ ki cha kiwi ki mar rep khang wow yarap chooh ya i yoh i kot yong ki. “I sñiawthooh i wa ka sorkar ka yarap wei kyruiñ khmat ko cha ki warep, tangwa emkaam ya kiwa yah luti wow wanrah ya ki laad yarap.”
“Kam u MLA nga kwah O wa kiwa chong chnong u ku ki haka kamai kajih wei wow roi ha ki kaam ki jaam wei kamjooh wow kyntu ya i roi i paar neibynta i bha i biang ki paidbah”, da ong chooh u. Neiliang u MLA da kit-bok kit-rwiang u ya kiwa chong chnong wei yooluti u wa kiyi kiyi ki myntoi wa yoh u man ki i kyrkhu ya ki.
Kiwa da emlang ha kani ka sngi nalor u Banteidor toh u Chairman ka Mawkynrew C&RD Block, u T. Pohshna, u Sordar ka chnong Nohron, u C. Nongrum, kiwa yahkhmat ka PDF Mawkynrew, ki bru rangbah deilang wa kiwa yoh myntoi na u MLA.
