U Lahkmen Rymbui, MLA ka Amlarem Constituency uwa man leh uwa e buit ka sorkar jylla, ynne ka sngi da saam Tablet u cha ki ASHA wa em hapoh ka Amlarem Block, West Jaiñtia Hills District, kam chibynta u pynsuk yei rukom krehkaam ki ASHA, khamtam neibynta wow paitbniah yei chait i khiah ki bru wa da palat 30 snem i rta heiyatoh wa ka BP, Diabetes, Cancer wa kiwi ki jait kjut.
Ha ka yalang saam Tablet wa da pynman ha yung krehkaam u Block Development Officer, Amlarem C&RD Block da emlang leh u Dr. Abishek Saini, SDO Amlarem Civil Sub-Division, u G.L.C. Mylliem, BDO Amlarem C&RD Block, Dr. Kin Dhar DM&HO, WJH, Dr. Maria Syngkon, District Nodal Officer Communicable Disease Control Programme NCDCP, Dr. Arvind Khonglah, Block Medical Officer Amlarem wa kiwi.
U Dr. A. Khonglah ong u wa kani toh ka sien wa nyngkong yong ka CBAC næ Community Based Assessment Checklist, wa hawa pait yei chait i khiah ki bru wa da palat 30 snem leh toh u pynpsiah yei pyrtuid yong ki hapoh ka Portal yong ka Non-Communicable Disease lyngba ka App wa da em ha kani ka Tablet ya kawa da booh ryntih da ka Health Ministry ka sorkar bei.
Ya kani ka CBAC u leh da ki ASHA wei i pynpsiah pyrtuid daw pynsuk wei pynsmat yei krehkaam yong ki, heiwa ki paidbah wa mih cha ki thaw e sumaar waphær waphær leh daw suk u thooh yei pyrtuid yong ki lyngba kani ka App.
U Lahkmen Rymbui da ong u kani toh ka sngi wow sahkynmoo wa lyngba kani ka luti wa chim ka sorkar da yoh u saam ya ki Tablet cha ki ASHA khnang yow smat i krehkaam ki wei ki paidbah leh u yoh yarap ki heipor wa biang.
Heijooh i por yooluti u wa daw man i yarap wa khroo ya ka sorkar neibynta u yoh yukheiñ neibhah wa ka thong ka sorkar toh waroh kiwa 30 snem chaneiñ toh u pait bniah yei chait i khiah yong ki.
Da pynrap haroh u wa ka Amlarem toh ka Aspirational Block hapoh ka jylla kawa dang emkaam chiboon u kyntu kynrong wym du hei chait i khiah tangwa yei stat i tip kamjooh.
Discussion about this post