U Montri Rangbah ka jylla, u Conrad Kongal Sangma da ong u wa ka jylla daw ye noh ko u sdang kreh tih mooyong da i stat ka juk wa katni namo ka ‘Scientific Mining’, neibhah ynne ka sngi da sah da du chi kaap donhi neibhah da em 17 ngut kiwa da yaleh wow yoh Licence, 4 ngut daw yoh ki wow tih mar ya pynpoi ya ki Mining Plan.
Hawa klam wa ki laad pathai khubor ynne ka sngi, u Conrad da ong u wa ki 4 ngut kiwa daw yoh License noh toh kiwa da yaleh rap nachwa, katwa ki 13 ngut kiwi daw boodien hadien wa da pyndep ki ya iwa emkaam waroh.
Da khana u wa ka Ministry of Coal yong ka sorkar India da phah ko dei thoh wa da mynjur ya ki Geological Report yong ki 4 ngut kiwa da paan License tih mooyong, wei chisien wa da mynjur ya kani ka Report kawa yatoh wa u mar pohkhyndaw da em i kyrmen wa i tih mooyong dei stat Scientific Mining daw sdang noh ha Meghalaya.
Da khana u wa hadien wa ka jylla da chah khang wow tih mooyong nadooh u snem 2014, kani ka sorkar da lai yasaaid ko ha ka Supreme Court, wei ka yung bichaar wa hakhlieh dooh ka ri da pynmih ko ya ka hukum kawa sah kynmoo, neibhah wa da pynksan yei mantre ya ki marpoh khyndaw da ki tre thaw. Da ong u wa heijooh i por ka Supreme Court da booh ko leh ya ki kyndon wow em bait da ka Scientific Mining, wei neiliang ka sorkar ha u Wisu (Mar) 2022 da pynmih ko ya ki kyndon namo ki Standard Operating Procedures (SOP).
Hawa kylli hajrong i dawa wow pynkylla ya ki kyndon (SOP) neibhah wym yahaap neidaw wa kiwa boon ki bru ym toh thaw ki iwa heh yow tih mooyong, neiliang u Montri Rangbah da ong u wa ya ki SOP da pynkhreh da ka sorkar India, wei ka sorkar India ym pynduna de ko yei heh i thaw wa emkaam, na ini i daw, ka sorkar jylla da pyrkhat ko wow lai chakhmat neibhah lada sahkut bait du heini, ym ye wow sdang mynnu mynnu leh tangwa da pynrap u leh wa ka sorkar jylla da pyrkhat ko wa emkaam wow sdang wei wow pynkylla ya kattu katni ki kyndon hadien wa da yoh License.
Hawa kylli chooh chooh, u Conrad da ong u wa i hap pynkrehkaam ya ki SOP neibynta wow tih ya u mooyong da ktah ko ya kiwa tih mooyong kiwa khian wa nai, tangwa katni da rai wow sdang bait neibhah bar wym yoh laad daw rap bha wow yoh sdang noh chwa.
