Shillong: Ka People’s Democratic Front (PDF) da pyntip ko wa da sai ko da u Mosjo Rockfeller Wanswett kam u kyrtong wow yaleh yaka Election chiteiñ samoi na Shella Constituency.
U MR Wanswett toh u diah yong u Leston Wanswett, uwa da yakhun na ka PDF ha ka Election MLA 2018 wei da wan wa ar u deiwa rem da 370 Vote tam ha u (L) Dr. Donkupar Roy.
“Hadien ka yalang pyrkhat sani bha wei kawa da chim por wow rai kyrtong na ka Party, i e khublei i ya ki paidbah, kiwa kyrchaan wa kiwa kitkaam ka Party neibhah i kwah i wow sai da u kyrtong wow jop ha kani ka Election”, da ong u Banteidor Lyngdoh uwa man leh u Working President ka PDF.
Ka PDF, kawa em soo ngut ki MLA, kawa emlang haka sorkar synrop Meghalaya Democratic Alliance (MDA) wei em ko ar ngut ki montri ha kani ka sorkar- u Banteidor Lyngdoh wa u Hamletson Dohling.
“Lada jop kiwon kiwon leh lada da ka UDP næ PDF leh daw pynskem ya ka sorkar MDA,” da ong u Bantei.
Neiliang u MR Wanswett da ong u, “U payu yong nga da yakhun u yaka Election MLA na Shella la le sien wei da leh u chiboon ki kaam neibynta ka thaaiñ tangwa katni da rap noh rta u wei da rai lang kiwa ha yung wow mih noh da nga cha khmat”.
Hawa kylli, uni u Inspector of Supply (wa da chong ngiah naka kaam), da ong u, “Nga yoo O wa emkaam wow pynku ya ka roi ka paar hawa yatoh wa ka surok ka luti syngkieñ, ka puræ puthi, ka chait ka khiah, ka um bam um dih wa kiwi kiwi.”
Discussion about this post