Shillong: Ka People’s Democratic Front (PDF) ha ka 2 tarik da pynbna ko ya ki pyrtuid ki kyrtong wow yakhun ha ka Election MDC ka KHADC wa JHADC ka wow man ha ka 27 tarik uni u bnai.
Ha ka thup wa pynlait da em i pyrtuid ka kurim u Banteidor Lyngdoh (uwa man u montri sorkar jylla wa pait ya ka chnat Sports and Youth Affairs, Agriculture) ka Amanda Annette Pakyntein na Mawkynrew Constituency na KHADC.
Ryngkat wa ka Amanda Pakyntein, da pynbna leh yei pyrtuid ka Macdalyn S Mawlong, kawa man ka payu u Jason Mawlong, MLA ka PDF na Umsning Constituency wa ka Teilinia S Thangkhiew, MDC ka Mylliem Constituency kawa man kam ka Dy CEM ka KHADC kawa man leh ka khon u MLA warim ka Mylliem u Pynshai M Syiem.
Da pynbna leh yei pyrtuid u Patboone Syngkli na Nongpoh Constituency. U Patboone Syngkli toh u kyrtong MLA ka Party ha na kani ka Constituency ha u snem 2018.
Da pynbna leh ya ar ngut ki kyrtong MDC ha JHADC wa kynthup ya u Timing Lyngdoh na Mynsngat-Khanduli wa u Manbha Lyngdoh na Muthlong-Sohkymphor.
Hadooh kani ka kynti ka PDF ka da sai ko 7 ngut ki kyrtong MDC 2019 cha JHADC ha ka sien wa nyngkong nadooh wa da pynkha ya ka Party ha u snem 2017.
Nalor ki kyrtong na Ri-loom Jaiñtia, ka PDF da sai ko 12 ngut ki kyrtong ki kyrtong wow yakhun MDC 2019 cha ka KHADC ryngkat wa kitai ki le ngut ki manbei.
Ki kyrtong wow yakhun kynthup ki ya soo ngut ki MDC KHADC wa dang em ha ka chuki wa kynthup ya u James Ban Basaiawmoit na Mawkhar-Pynthorumkhrah, u Morningstar Mawsor na Mawshynrut, u Arbinus Lyngdoh na Umroi wa u Hadrian Lyngdoh na Mawkyrwat.
Nalor kini kiwi won kynthup ki ya u Witness Sancley na Jirang, u Joseph J Makdoh na Mawhati, u Aldrin L Chyne na Sohra, u Melamshwa Rynjah na Nongkrem, u Fedrick J Lyngshiang na Laban-Mawprem, u Auspicious Lyngdoh uwa man leh u General Secretary ka PDF na Mawphlang-Diengiei wa u Beland Nongbri na Nongspung-Sohiong.
Katwa kiwi won ki kyrtong MDC 2019 cha ka JHADC kynthup ki ya u Lom Nongrum (Mukhla- Wahjajer), u Dapoiwanmi Laloo (Central Jowai), u Helping Phawa (Sutnga-Tuber), u Bisharbha Pala (Sutnga-Nongkhlieh) wa u Albinus Lamurong (Sutnga-Sumer).
Discussion about this post