Ka United Democratic Party (UDP) ynne ka sngi da pynbna ko wow sai ya u kyrtong chiteiñ samoi na Rajabala, da u Ashahel Dalbot Shira uwa man leh u MDC ha GHADC na Batabari, katwa neibynta ka Mawrynkneng ka UDP da rai ko wow kyrchaan ya u kyrtong ka National People’s Party (NPP), u Pyniaid S Syiem.
Da ini i rai ka UDP kawa man kawi na ki seiñ wa heh kawa emlang ha ka sorkar jylla, daw pynyakhun ko du ha ki 2 na ki 3 tylli ki Constituency ki wow man Election chiteiñ samoi ha ka 30 tarik uni u bnai.
Hawa yaklam wa kiwa pathai khubor, u President ka UDP, u Metbah Lyngdoh da ong u wa ha Mawryngkneng wa ka Party ym em u sai kyrtong ko toh hadien wa ki heh katai ka Circle da pynsñiaw ki wa kwah ki wow kyrchaan ya u Pyniaid uwa man u kyrtong ka NPP, wei kam ka party da pdiang ko ya ini i tyrwa.
Da ong u leh wa neibynta ka Mawphlang wa Mawryngkneng ya ki kyrtong wa sai wa kiwa kyrchaan, da leh deiwa yaklam lang ha ka yalang ka Regional Democratic Alliance (RDA).
Ha iwi i liang heiyatoh wa ka Rajabala u Metbah da ong u wa ka Party da bichaar bniah wei sñiaw ko wa u Ashahel em u i kyrmen wa ka Party u jop ko khamtam hadien wa mih ka Result MDC.
U Ashahel D Shira da jop u ya ka Election MDC na ka Congress na Batabari, da man u leh kam u MLA ka Rajabala ha u snem 2013-18 wei da chah pynrem u ha u Dr. Azan Zaman ha ka Election 2018, neibynta ka Election chiteiñ samoi leh u Shira da paan ticket u wow yakhun na ka Congress tangwa ka Congress da e ko ya ka Ticket cha ka kurim u Dr. Zaman, ka Hasina Yasmin Mondal.
